Canada Issittumi ilisimatusarfik aallartilluartoq
Canadap issittortaani Issittumi pissutsit pillugit nutaamik ilisimatusarfiliortoqarnissaanik Canadami premierministeriusimasup Stephen Harperip neriorsuuteqarneranit ukiut qulit maanna qaangiupput.
Ukiut qulit 1 milliard koruunillu atorlugit ilisimatusarfik angisoorsuaq kusanartorlu, taaguuteqartoq Canada High Arctic Research Station, sanaartorneqarpoq.
Sanaartorneq naammassivissunngikkaluartoq ilisimatuunit ukiuni sisamani atorneqareerpoq. Ilisimatuunut katillugit 44-nut inissaqartitsivoq nutaaliaanerpaanillu atortorissaarusersugaalluni.
Ilaatigut "uumasunik passussisarfeqarpoq", soorlu uumasut angisuut timaat toqungasut misissornissaannut kranimik mikisumik kivitsissutaasinnaasumik atortulerneqarsimasumik.
Aamma nillataartitsivimmik misissuiveqarpoq, tassanilu -10 gradinik nillertigiuaannarpoq aputillu sermillu ilisimatusarfigineqarnerinut atugassiaalluni.
Misissuivittaaq eqqiluilluinnartoq, uumasut naasullu tassani mingutsinneqarnissaat navianaateqartinnagu misissuiffigineqarsinnaasumik peqarpoq.
Ilisimatusarfiup taamatut atortorissaaruserugaaneratigut ilisimatuunit nunarsuarmit tamarmeersunit ornigarneqalernissaa neriuutigineqarpoq anguneqareerlunittaaq.
Ilisimatusarfiup aamma Iqaluktuuttiarmiut suleqatigai. Ilisimatusarfik nunaqarfiup qiterpasissuani inissisimammat meeqqanik aamma ilinniartitsisoqarsinnaavoq. Nunaqarfimmiullu ilisimasatoqaat ilisimatusarfiup suliaanut ilanngunneqarsinnaallutittaaq.
Ilisimatusarfiup pisortaata David Scottep oqaatigaa ilisimatusarnermik pitsaanerpaamik ingerlatsinissamut nunaqarfimmiunik peqataatitsinissaq pingaaruteqartuusoq.
Links:
The Canadian High Arctic Research Station (CHARS) campus
Assit pisortatigoortut flickr-imi
The station’s design was developed through the Inuit Qaujimajatuqangit (IQ) approach. IQ was developed in Nunavut and articulates the pillars of traditional Inuit knowledge:
- Piliriqatigiingniq – collaborative relationship;
- Avatimik kamattiarniq – environmental stewardship;
- Qanuqtuurungarniq – resourcefulness / problem-solving; and,
- Pilimmaksarniq – skills and knowledge acquisition.
