Issittumi avatangiisit illersorneqarnissaat piumasaraat
Issittup imartaata angallaffiunera annertusiartortillugu, issittup sineriaa annertunerusumik illersorneqarnissaa Canadami inuit oqartussaasuisa ilaat piumasaraat.
Umiarsuarmik angalaarneq nuannarineqarneruleriartorpoq, aatsitassanillu ujaarlerneq annertuneruleriartorluni.
Ukioq 2007 tassaavoq Issittup Ukiua, Canadallu avannamut sineriaani ilisimasassarsiornerit amerleriassapput.
Canadap issittortaani umiarsualiveqannginnera pissutigalugu umiarsuarpassuit nunatsinni orsersortarput, ilaalli imaannarsuarmi orsersortarput.
Taamaalionermi uuliarluernissaq qanittuararsuusarpoq, inuillu oqartussaasuisa taamatut orsersortarnerit kingunerlussinnaanerat annilaanngatigaat.
- Avatangiisit mingutsinneqarsinnaanissaat annilaanngatigaarput, Qikiqtaalummi Pond Inlet-imi borgmesteri David Qamaniq CBC North-imut oqarpoq.
Canadap issittortaata sineriaani illoqarfiit qulit mingutsitsinermut akiuinissamut atortussalerneqarsimapput, inuilli oqartussaasuisa annilaanngitgaat tamanna naammanngitsoq.
