Issittumi aningaasaqarnermut siunnersuisooqatigiiliulersut
Issittumi Siunnersuisooqatigiinnut siorna maajip qaammataani toqqagaanerminut atatillugu aningaasaqarnermut siunnersuisooqatigiinnik pilersitsinissamik ilaatigut anguniagarluni nalunaarutigaa. Leona Aglukkallu issittumi niuernikkut saqqummersitsinersuarmut, Ottawami sapaatit-akunneranni uani ingerlanneqartumut atatillugu, pilersitsisoqalersoq nalunaarutigaa.
Leona Aglukkap tusagassiortunut oqaatigaa issittumi aningaasarsiornikkut ineriartortitsinerup qanoq ingerlanneqartariaqarneranut atatillugu Canadap Rusland Norgelu ilinniarfigisariaqarai, aningaasarsiornikkut periusissianik kujasinnerusumit aalliinnarani.
Aammattaaq oqaatigaa issittumi nunat Issittumi siunnersuisooqatigiinnut ilaasortaasut suleqatigiinnerat amigaateqartoq - tassalu aningaasarsiornikkut ineriartitsinikkut suleqatigiinnermik.
Issittumi Siunnersuisooqatigiit aningaasarsiornermut tunngasut tunulliullugit avatangiisinut kulturikkullu ilisimatusarnermut tunngasut samminerusimavai.
Issittumi nunat arfineq-pingasuusut pisuussutinik ineriartortitsinermik, aammalu assersuutigalugu Beaufortip imartaani allanilu sinerissap avataani uuliasiorluni qillerinissamik pilersaarutinik ingerlataqarput. Aningaasaqarnermut siunnersuisooqatigiit tassaassapput ineriartornermik taassuminnga misilittakkanik paarlaasseqatigiittarfissaq, Leona Aglukkaq oqarpoq.
Issittumi aningaasaqarneq pillugu siunnersuisooqatigiit issittumi suliffeqarfinnit suliffissuarnillu, angigaluarpata mikigaluarpataluunniit atorneqarsinnaassaaq, nunalli ataasiakkaat inuussutissarsiuutit sorliit ilaasortanngorsinnaanersut nammineerlutik aalajangissavaat.
Nunat tamalaat aningaasarsiornikkut isummersoqatigiiffissuata, Schweitzimi Davosimi ataatsimeeqqammersup nalunaarusiamini eqqaavaa inuiaat issittormiut sulieqatigiinnikkut periusissanik nutaanik nassaarnissaat pisariaqartoq, taamaaliornikkut suliffissut nunat tamalaaneersut nunallu naalakkersuisuinik suleqateqarnissaat peqatigisaanillu issittumi piujuaannartitsinissamik tunngaveqarluni allannguuteqartitsinissamut periarfissaqarniassammata.
