Issittumi allannguutit pillugit nittartagaq nutaaq

Danskit Silap pissusiinut, Nukissiuutinut Illuutinullu ministeriaqarfiat issittoq pillugu nittartakkamik aqagu atulersitsissaaq. Nittartagaq detnyearktis.dk meeqqat atuarfianni atuartunut angajullernut saaffiginnittuuvoq, issittumilu silap pissusiisa allanngoriartorneri sammineqarlutik.
februaarip 04-at 2013 08:37

Issittoq ukiuni makkunani sammineqartupilussuuvoq, ilaatigut  silap pissusiisa allanngoriartorneri imaatigut ingerlaarfissanik nutaanik pilersitsiortorlutik. Uuliasiorneq aatsitassarsiornerlu aamma annertusiartorput. Allannguutit annertuut Danmarkimi Kalaallit Nunaannilu meeqqat atuarfiini atuartunut nassuiarneqarput. Nittartagaq aqagu atulersinneqassaaq maannangaarlu iserfigineqarsinnaalereerluni.

- Atuartut Issittumi silap pissusiisa allanngoriartorneri pillugit ilisimasanik nutaajunerpaanik pissarsisinnaapput. Issittoq tassaavoq nunarsuarmi sumiiffiit nunarsuup kissatsikkiartorneranik malussarfiusussat siulliit ilaat. Taamaammat allanngoriartorfiunera sunik unammilligassaqarnitsinnik assigiinngitsutigut paasisaqarfigisinnaavarput, danskit silap pissusiinut, nukissiuutinut illuutinullu ministeriat Martin Lidegaard oqarpoq.

Issittumi silap pissusiisa allanngoriartorneri atuagassiani assigiinngitsuni nassuiarneqarsimapput, ilisimatuullu allaaserinnittuusarlutik. Issittoq nutaaq ilinniagartuujunngikkaluarluni paasineqarsinnaanngorlugu maanna nassuiarneqarpoq.

- Issittoq soqutiginartupilussuuvoq, allannguutimmi ukiuni tullerni amerlasoorsuarni atugarisussaavagut. Issittoq pillugu oqaluttuat ilisimatuussutsikkut allaaserisatigut tamatuminnga sammisaqarlutik suliaqartunut saqqummiunneqakkajuttarput, nittartakkamili detnyearktis.dk-mi issittumi silap pissusiisa allanngoriartorneri pillugit maannakkorpiaq ilisimasat paasiuminarsarlugit saqqummiuppagut, suliniummik ataqatigiissaarisoq, Morten Skovgård Olsen, Nukissuuteqarnermut ministeriaqarfimmeersoq oqarpoq.

Nittartagaq nutaaq ugguuna iserfigisinnaavat: http://detnyearktis.dk/