Assi: KNR

Issittumi alapernaarsuutini ilinniarsimasut amigaataasut

Issittumi sakkutuut imarsiortut ilinniarsimasunik inuttanik amigaateqarnerat pissutigalugu nunatsinni 2016-imi 2017-imilu sungiusarnerit affaat naammaginartumik naammassineqanngitsut, naalagaaffiup kukkunersiuisuisa nalunaarusiaanni atuarneqarsinnaavoq.

Nunaqarfiit Nuugaatsiaq Illorsuillu juunimi 2017-imi tassaarsuarneranik eqqorneqarmata Illersornissaqarfiup alapernaarsuutaat ujaasinermut annaassiniarnermullu ikiuuteqquneqarput.

Umiarsuarmili inuttanik arfineq-pingasunik amigaateqarpoq.

Tamatumunnga taarsiullugu sakkutuujusussaatitaasut qulit ilinniarnerminnut atatillugu umiarsuarmiittut ikiuupput. Piffissamili tassani tassaarsuarnerani taakku aatsaat ullut sisamassaani ilaapput.

Naalagaaffiit kukkunersiuisuisa Illersornissaqarfiup Issittumi suliaanut nalunaarusiaani tamanna allassimavoq.

Nunatsinni Savalimmiunilu alapernaarsuutaat marluk inuttanik piukkunnaateqartunik amigaateqartut tassani inerniliussaavoq.

Qaammatit marluinnaat naammaginartoq

Umiarsuit alapernaarsuutit nunatsinni sulinerat 2017-imi qaammatini marluinnarni ”naammaginartuusimasoq” oqaatigineqarpoq. Qaammatillu sinnerini sulinerat ”naammaginannginnerusutut” ”naammaginanngitsutullu” oqaatigineqarluni.

AAMMA ATUARUK Illersornissaqarfiup issittumi suliniutai naammagisimaarneqartut

Inuttat ilinniarsimasut amigaataanerat pissutigalugu Illersornissaqarfiup NATO-mit piumasaqaatit malillugit Issittumi ukiumut sisamariarlutik sungiusartarnerit pitsaanerpaamik angusaqarfiginngikkai, nalunaarusiami allassimavoq.

Illersornissaqarfik naapertorlugu umiarsuarmi atorfiit piumasaqaatinut naleqquttumik naammattumik inuttalersugaapput. Illersornissaqarfiulli ilinniarsimasunik amerlanerusunik Issittumi alapernaarsuutinut inuttaqalernissaanik aaqqiissuteqarniartoq, Naalagaaffiup kukkunersiuisuinit nalunaarusiami allaasimavoq.

AAMMA ATUARUK Qulimiguullit nutaat ornigukkasuarsinnaassusiat killeqartoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat