Issittumi aaqqiissuteqarusupput

Nunat issittut ataatsimiititaliaat Moskvami sapaatip akunnerani uani ataatsimeeqqammersut, issittoq pillugu isumaqatigiinneruniarput.
septembarip 24-at 2010 09:53

Rusland ataatsimiinnermi qaaqqusisuuvoq. Peqataasut 300-t missaanniittut ilagaat ministerit, politikerit, ilisimatuut aamma suliniaqatigiiffiit arlallit.

Naapeqatigiinnermi siunertat pingaarnersaraat, naalagaaffiit akunnerminni attavigeqatiittarnerisa atorluarneqarnissaat, taamaalilluni sakkutuulersuineq pinngitsoortinneqarsinnaammat.

- Nunat issittut oqallisigineqartillugit aammalu taakku pillugit aaqqiagiinngittoqartillugu, naalagaaffiit akunnerminni attavigiilluartarnerat atornerusariaqarpoq, Ruslandip primierministeria, Vladimir Putin, oqalugiarnermini ilaatigut oqarpoq.

Imartat aqqutigineqartarnerat, aatsitassat, gassi uulialu pillugit aaqqiagiinninngittarnerit atorunnaartariaqartut, Putin isumaqarpoq.

- Aaqqiagiinngittarnerit pilersitaannik ersinarsinnaasunik pilersitsisinnaaneq nunani issittuni atussallugu pissutissaqanngilagut. Aaqqiagiinngittoqartillugu ajornartorsiut suleqatigiinnikkut isumaqatigiinniarnikkullu, nunarsuarmi inatsisit maleruaqqusat malillugit aaqqiisoqartariaqarpoq, Putin BBC-mit issuarneqarpoq.

Nunat issittut imartaat annertoorujussuaq Ruslandip maannamut oqartussaaffigissallugu piumasaqaatigereerpaa, nunalli soorlu, Canadap, USA-p aamma Danmarkip imartat ilaat aamma piumasaqaatigereersimallugit.

Barentip imartaa pillugu Rusland aamma Norge suleqatigiinnissamik isumaqatigeereerput, taannalu atsiorneqarpoq qaammammi uani.

Issittup imartaa pillugu paasissutissanik allanik paasisassarsiornermi, Ruslandimiut aningaasat 400 millioni koruunit atoreersimalereerpaat.

Canadami ilanngutassiortorput Marianne Stenbæk ilanngutassiivoq.