Issittumi aalisakkat ilisimasaqarfigivallaanngilagut
Ilisimatuut Tromsømi Issittumi ilisimatusarfimmeersut, Canadamilu ilisimatuut peqatigalugit imeq tarajuunngitsumit aalisakkat 120-it aalisakkallu imarpissuarmiittut 635-t misissorsimavaat.
- Issittumi aalisakkat assigiinngitsut pissusaat, suffisarfii silallu pissusiata allanngoriartorneranik qanoq sunnerneqartarnersut ilisimaneqarpallaanngillat, Issittumi ilisimatooq Jørgen Schou Christiansen videnskab.dk-mut taama allappoq.
Misissuinerit takutippaat issittumi aalisakkat assigiinngitsut 755-iusut. Arlallit amerlasoorujussuupput, siaruarsimasuullutillu - soorlu eqaluk. Ilaallu qaqutigoorlutik.
Saarulliit avannarpartertut akornutaaleratarsinnaasut
Misissuinerullu uppernarsarpaa silap pissusiata allanngulernera aalisakkat tunisassiarineqarsinnaasut soorlu avaleraasartuut saarulliillu issittup imartaanut siammaakkiartortut - nunatsinnilu tamanna malugineqarumaarpoq - avaleraasartuut eqqarsaatigalugit. Taamaakkaluartoq aalisarneq ajornartorsiortitsilersinnaasoq, ilisimatuup Jørgen Schou Christiansenip oqaatigaa.
- Aalisakkat massakkut aalisarneqartut saniatigut allat aalisarneqartalissapput, professor Jørgen Schou Christiansen Videnskab.dk-mut oqarpoq.
Taassumallu nittartakkakkut nutaarsiassaqartitsivimmut tikkuartorpaa issittoq avinngarusimasuunngitsoq, kisiannili nunagineqartoq inunnit aalisarnermik inuuniutilinnit.
AAMMA ATUARUK Avannaata Imaani sajuppillatitsilluni misissuisoqalerpoq
- Inuiaqatigiit piorsarsimassusaallu silap pissusiata allanngoriartornera malugeqqaartussaavaat. Ineriartorneq annertooq - suliffissaqalersitsineq, avatangiisinullu suliniaqatigiiffiit pisariaqanngitsut taakkununnga malunniuttussaapput, Jørgen Schou Christiansen videnskab.dk taama oqarpoq.
Uuliasiorniarneq ilisimatuunit ernummatigineqarpoq
Seismiskimik misissuinerit, tassa sajuppillatsitsilluni misissuinikkut uuliasiortut uuliaqarneranik paasiniaasarput. Tamannalu aalisakkat ingerlaarnerannik allanngortitsisarpoq. Luftkanonit atorlugit, dynamitinik immallu naqqani sajuppillatsitsinerit atorlugit misissuisoqartarpoq.
