Issittoq soqutigineqaleraluttuinnarpoq

Issittumi siunnersuisoqatigiinni Nunat Avannarliit, Kalaallit Nunaat, USA, Canada aamma Rusland ataavartumik ilaasortaapput, Kina-miulli soqutiginninnerat annertusigaluttuinnarpoq alaatsinaattutullu maanna inissisimallutik.

Issittumi Siunnersuisoqatigiit qaammammi matumani ataatsimiittussaapput, Kinamiullu alaatsinaattussanik arfinilinnik aallartitsiniarput:

- Issittumi Siunnersuisoqatigiinni oqallisigineqartartut Kinamiunit soqutigineqartartut tamanna ersersiinnarpaa, Karsten Klepsvik, Siunnersuisoqatigiit Norgemi Tromsømi allattoqarfianneersoq CBC Newsimut oqarpoq.

Italia, Frankrigi, Tysklandi, Tuluit Nunaat, Poleni Spanialu alaatsinaattutut maanna aamma inissisimalereerput.

- Nunat allat ilaasortanngornissaat aamma ilimanaateqarpoq. Issittumut iluaqutaassaqaaq, Issittumimi ajornartorsiutigineqartut, soorlu silaannap kissatsikkiartornerata immamik nunamik silaannarmillu mingutsitsinera, nunanit allaneersunit pipput, Issittumi pissutsinut ilisimatooq Terry Fenge Canadameersoq oqarpoq.

Silap pissusaata allanngoriartornerata kingunerisaanik uuliasiorlunilu gassimik qalluisalersinnaanissaq periarfissanngorsinnaammat Issittumik soqutiginninneq annertusigaluttuinnarneqarpoq.

- Avatangiisit pillugit politikkip Issittumi Siunnersuisoqatigiinni annertunerusumik oqallissutigisalernissaa ammaassiffigineqassaaq, oqarpoq, nangipporlu:

- Tamannami pingaaruteqarpoq, ukiunimi qulikkaani tulliuttuni Issittumi suliffissuaqalernissaq ilimanarsinnaammat, Terry Fenge oqarpoq.

Issittumi Siunnersuisioqatigiit Norgemi qaammatip matuma ingerlanerani ataatsimiissapput, nunallu Issittumut attuumassuteqanngitsut Siunnersuisoqatigiinnik sunniuteqarsinnaassusiat qanoq annertutigissanersoq sammineqassalluni.