Issittoq russinit sammineqarnerulersoq
Putinip, russit illersornissamut aqutsisoqarfianut oqalugiaateqarluni, sakkutuut Issittumi suliniuteqarnerat nersualaarpaa. Ilaatigummi Canada, USA, Norge aamma Danmark/Nunarpullu Issittup imartaani, Qalasersuarmilu, pinngortitap pisuussutaanik piginnittuunermik piumasaqaateqarsimapput.
- Issittumi atortulersuutit, sakkutooqarnikkullu aaqqissuussinerit, ineriartortinneqarnerisa immikkut nakkutiginissaannik qinnuigissavassi, Putin sakkutooqarnikkut aqutsisunut ilaatigut oqarpoq.
Sakkutooqarfiup Tiksip ukiup naannginnerani nutarterneqarnissaa pilersaarutaavoq, aammalu Severomorskimi sakkutooqarfiup sanaartorneqarnera naammassineqartussaalluni, Putin naalagaaffiup TV-atigut toqqaannartumnik aallakaatinneqartumi taama oqarpoq.
Qeqertani Novosibirskimi sakkutooqarfik ukiormanna naammassineqarpoq, sakkutuullu umiarsuaat qulit, umiarsuillu sikusiutit sisamat, pissaanermik takutitsiniutitut qeqertanukartinneqarlutik.
Putinittaaq USA-p Issittumi siooaranartunik iliorsinnaanera sapaatip-akunnerani uani eqqaasimavaa.
Nunat Issittumut sineriallit tallimaasut 2008-mi isumaqatigiikkaluarput killeqarfinnik aalajangersaanissaq eqqissisimasumik pissasoq, Qalasersuarmilli piginnittussaatitaanerup sivisoorsuarmik assortuussataanissaa ilimagineqarpoq, ilaatigut immap naqqani qaqqat uiguleriit Lomonosov Kalaallit Nunaannit Qalasersuakkoorlutik Ruslandimut kilometerinik 1800 siaarsimanerat pissutigalugu.
