Issittoq pillugu pilersaarummik danskit naalakkersuisui saqqummiussingajalersut
Danskit naalakkersuisuisa ataasinngorpat saqqummiussassaanni Folketingimi amerlanerussuteqartut pilersaarutigaat Issittumi Kalaallit Nunaannilu suliniummut Danmarkip aningaasat millionilikkaat pingasunik kisitsisitalinnik aningaasartuutini ilaniarai.
Suliniummut annertusisamut eqqarsaatigineqartut tassaapput qaammataasaniit nakkutiginninnerit annertusisat Sakkutuullu imarsiortut amerlanerusunik aningaasaliiffigineqarnerat.
Aamma atuaruk Issittumi umiarsualeeqqittoqaranilu timmisartuleeqqittoqassanngilaq
Sakkutuut Issittumi suliarpassuisa nukittorsarneqarnissaat pineqarpoq.
Københavnip Universitetiani sakkutooqarneq pillugu ilisimatusarluarsimasoq Kristian Sæby Kristensen taama naliliivoq.
Taama siunnersuutigineqartut saqqummiunneqassapput Issittoq pillugu nalilersuinerit sivisuumik utaqqineqarsimasut ataasinngorpat saqqummiunneqarpata.
Namminersortuusutut akuerineqarnissaq pineqarpoq, tassa Issittumi danskit naalagaaffiata tamanna ilagimmagu taavani immakkut angalaartoqartoq, aammalu inuit tamaani najugallit tapersersorniarlugit, soorlu annaassiniartarnerit, avatangiisinik nakkutiginninneq aalisartunillu nakkutilliinerit eqqarsaatigalugit ilaallu ilanngullugit.
Suliniutinut taama ittunut annertusaanissanut millionit pingasunik kisitsisitallit Folketingimi amerlanerussuteqartut tapersersoreerpaat, siunissamilu illersornissamut ukiumoortunik aningaasartuutissat aamma annertusiumaarlugit. Jyllandsposten taama allaaserisaqarpoq.
Suliniutinik annertusaanissanik tapersersuisut ilagaat Dansk Folkeparti, illersornissarlu pillugu oqaaseqartartuat Marie Krarup isumaqarpoq Issittoq Danmarkip ilaatut aatsaat taama pingaaruteqartigilersimasoq - annaassiniartarnerit eqqarsaatigalugit Danmarkillu tamaani namminersortuunerata akuerineqarnissaa.
- Taamaattumik Issittumiinnerusariaqarpugut tamanullu erseqqissumik paasitillugu, tamanna naalagaaffimmut ilaasuummat allanit orninneqarluni tigusarineqarsinnaanngitsoq, Dansk Folkepartiip illersornissaq pillugu oqaaseqartartua Marie Krarup DR-imut oqarpoq.