Issittoq pillugu paasisassarsiorfik

Arktisk Instituti Nordatlantens Bryggemi quersuit ilaanni pinnguaatinik atortussanillu assigiinngitsunik misileraaffissamik pilersiterusuppoq, Danmarkip Nunattalu attumassutaannik kiisalu issittumi pisunut pissutsinut ilisimasaqarnerulersitsiumallutik.
marsip 05-at 2012 10:12

Arktisk Institutip paasisassarsiorfimmik, misileraavimmik misigisassarsiorfimmillu Københavnimi Nord Atlantens Bryggemi pilersitsiguni, qimussertuusaartoqarsinnaassaaq, assiliivik issittumiittoq inuinnarnit aqunneqarsinnaassaaq kiisalu qanga umiarsuit niuffagiutit qanoq aqunneqartarsimaneri misilittarneqarsinnaassallutik.

Arktisk Institutip anguniagaa pilersaarutaannaagallarpoq. Taamaattorli ukiup affaani tulliuttumi pilersaarusioqqissaarnissamut amingaasaliisussarsiornissamullu fondinit aningaasalerneqarsimavoq. Suliniummi Arktisk Institutimeersoq Lisbeth Valgreen siuttuuvoq.
- Anguniagaraarput toqqortaatit takutissornissai, aammattaaq issittumi Danmarkip oqaluttuarisaanera ullumimut qanoq ingerlassimanera ersersikkusupparput, Lisbeth Valgreen oqarpoq.

 Issittoq pillugu paasisassarsiorfissaq quersuit atorneqanngitsut ilaanni, Nordatlantens Bryggemi pilersinneqassaaq. Paasisassarsiorfissap pingaarnertut meeqqat atuartullu saaffigissavai, tamaattorli qallunaat takornariallu Danmarkikkoorlutik Nunatsinnukartut aamma saaffigineqassapput.

Taamatut pilersaarusiorneq pivoq, issittumi pisunut pissutsinullu soqutiginninneq annertusiartornera ilutigalugu. Københavnimi uumasuusivik issittumut tunngassutilinnik annertusaavoq. Legoland Polar Landimik ammaavoq.
- Ullumikkut issittoq sammisaaqaaq, taamaakkaluartoq pingaarpoq Kalaallit Nunaat namminersulernera tassungalu atatillugu Kalaallit Nunaat Danmarkimut atassutaa allanngulersoq sammissallugu aamma pingaaruteqarpoq, Lisbeth Valgreen oqarpoq.

Arktisk Instituti suliniaqatigiinnik pilersitsinikuupput. Taakkunani ilaapput, Københavnimi Eksperimentariumimi pisortaq Asgar Høeg, Statens Naturhistoriske Museumimi pisortaq Morten Meldgaard, geologimi professori Minik Rosing, repræsentationschefi Tove Søvndahl Pedersen kiisalu Nordatlantens Bryggemi pisortaq Karin Elsubudóttir.