Issittoq pillugu nalunaarusiaq Folketingimut ilaasortanit nersualaarneqartoq
Ingammillu innuttaasut piumasut akulerutsinneqarnissaat taperserneqarluni.
Illersornissaqarfiup unnersuussutigisaatigut Inuit Ataqatigiit ukiorpassuarni ilungersuutigisimasaasa ilaat kiisami piviusunngortussanngorunarpoq, tassalu Issittumi sakkutooqarfimmut atasunik upalungaarsimasuusussanik pilersitsinissaq.
Illersornissaqarfiummi nalunaarusiaani tamanna ilaasoq KNR-ip paasivaa.
Inuit Ataqatigiillu Folketingimi ilaasortaatitaata Aaja Chemnitz Larsenip tamanna nuannaarutigaa.
- Ullumikkut imaappoq ajutoortoqartillugu inuit ajutoorfiup eqqaaniittut ikiuuttarlutik. Taamatullu ingerlaannartoqarnissaa anguniarlugu inuit taamaaliornissaannut pitsanngorsaaqataagaanni, annaassiniarneq ajunnginnerusumik ingerlanneqarsinnaavoq.
Aamma atuaruk Issittumi umiarsualeeqqittoqaranilu timmisartuleeqqittoqassanngilaq
Nakkutilliinerup pitsanngorsarneqarnissaa taperserneqartoq
Nalunaarusiap aamma unnersuussutigaa timmisartut nakkutilliissutit umiarsuillu Issittumiittut amerlinagit qaammataasatigut nakkutilliissutinut aningaasat atortariaqartut.
Nalunaarusiaq saqqummiunneqareerpat Aaja Chemnitz Larsen aatsaat erseqqissumik isummerusukkaluarluni ima oqarpoq:
- Nakkutilliinermik pitsanngorsaaniarneq eqqarsaatigalugu pisariaqartinneqarsimavoq teknologiip atornissaa. Isumaqarpunga taannartaa assorsuq isumassarsiatsialaasoq. Tassaavorlu Issittumi sakkutooqarfiup aamma nammineq uparuagaa.
Aamma atuaruk Issittumi kajumissutsimik upajungaarsimasoqarnissaq danskinit taperserneqarpoq
Aleqa Hammondip nalunaarusiamit saqqummiunneqarallartut aamma ajorinngilai, ingammik piumassutsiminnik upalungaarsimasussat eqqarsaatigalugit.
Mikisualuit eqqartunngikkaluarlugit neriorsuivoq naalakkersuisut nalunaarusiami siunnersuutaat tapersersorumallugit.
- Nalunaarusiamut Kalaallit Nunaata ilanngussimasai tapersersorluarumaarpagut. Naalagaaffeqatigiinnerullu nukittorsarneqarnissaa eqqarsaatigalugu suli pitsanngorsaaqataaqqikkusuppugut. Namminersortuusutullu akuerineqarnissaq eqqarsaatigalugu tapersersuinissara naatsorsuutigissavaat, taanna oqarpoq.
