Issittoq pillugu isumaqatigiissuteqartoqarpoq
Nunani avannarlerni suleqatigiinnermut ministerit Narsami ataatsimeeqqammerput, isumaqatigiissutigaallu, issittumi nutaamik suleqatigiilernissaq.
Issittumi apeqqutinut tunngasut suleqatigiissutigineqartassapput, anguniagaavorlu, nunat tamalaat issittumut ukiorititaannut 2007-imit 2009-mut atatillugu nunat avannarliit suleqatigiilluarnissaat. Taamatuttaaq nunat avannarliit Issittumi Siunnersuisoqatigiinni suleqatigiinnerat nukittorsarniarneqarpoq.
Nunat avannarliit suleqatigiinnerannut Nunatsinni naalakkersuisoq Josef Motzfeldt oqarpoq, silaannaap ilisimatusarfigineqarnerata kiisalu silaannaap kissakkiartornerata issittumi inunnut sunniutai pillugit erseqqissumik anguniagassaqartoqalertoq. Naalakkersuisoq aamma isumaqarpoq, avatangiisimut mingutsitsinerit uumasunut navianartorsiortitsisut pillugit paasisaqarnerunissamut suleqatigiinneq ingerlaannassasoq.
- Nunat avannarliit matumani suleqatigiittarnissaat pingaaruteqarpoq, Issittumi Siunnersuisoqatigiinni ilaasortanut naalagaaffinnut angisuunut nukittunerullutik aqqutissiuussisinnaanissaat pillugu. Josef Motzfeldt oqarpoq.