Issittoq pillugu isumaqatigiinniarnerit Kalaallit Nunaannut isumagisassanngortissigik
Danmarkimi ministerit issittoq pillugu ataatsimiinnernut siunissami peqataajumasarunnaarnissaat Lars-Emil Johansenip ernummatigaa, taamaattumik issittumi nunallit isumaqatigiinniartarnerinut Kalaallit Nunaata pisinnaatitaaffianut inatsisip 2005-imeersup atuutsinneqalernissaa kaammattuutigaa.
Nunatsinni naalakkersuisut nammineerlutik naalagaaffinnik allanik suliniaqatigiiffinnillu pisortatigoortuunngitsumik ingerlanneqartunut isumaqatigiinniarsinnaanerannik inatsit periarfissiivoq, inatsisip ataani allassimasumi Kunngeqarfimmi Danmarkimi Kalaallit Nunaannut tunngassuteqartunut taamatut periarfissaqarmat.
- Issittumi isumaqatiginniarnerit uagutsinnut tunniussigik, tamannami inatsisitigut tunngavissaqareerpoq, Lars-Emil Johansen oqarpoq.
Taassuma innersuussutigaa, Kalaallit Nunaat Danmarkimut sanilliullu, nunat issittut akornanni ineriartornernut sukkasoorussuarmut peqataammat, taamaattumillu Kalaallit Nunaata pingaartitaasa issittumi isumaqatigiinniarnerni Nunatsinnit namminermit isumagineqarnissaat pingaaruteqarluinnarpoq, Lars-Emil Johansen oqarpoq.
- Danmarkimi issittumut politikki sammineqarnerusariaqarpoq, ministerinut ataasiakkaanut sassussisaqattaarnerit pinnagit, taamaaliornikkummi pineqartoq qimanneqartarmat, tamannalu Nunatta iluaqutigisinnaanngilaa, Lars-Emil Johansen naggasiivoq.