Issittoq pillugu Ilimmarfimmi ataatsimeersuartoqarpoq

Issittoq pillugu piniartut aalisartullu aamma ilisimatuut silap pissusaata allanngoriartorneranut atatillugu paasisaasa paarlaateqatigiissutiginissaat pingaartuuvoq, pingaartumik issittumi immap sikuusarneranut paasissutissat tunngasut kingulliit.
Allattoq Najaaraq Egede
januaarip 18-at 2009 09:39

Ilimmarfimmi ullumi aqagulu(17-18. januaari) tamanut ammasumik ataatsimeersuartoqarnerani issittumi pissutsinik ilisimasallit peqataaput, tassanilu saqqummiisussanut ilaavoq inuiaqatigiilerinermik ilinniarsimasoq Lene Kielsen Holm, ICC-meersoq. Aqagu oqalugiaatissani pillugu Lene Kielsen Holm ima oqarpoq:

- Avannaani soorlu qimussimik ukiukkut piniartut malugisaat unaasimavoq sikup saaliartornera, saaliartorneralu peqqutaalluni piniartuunerup uloriarnartorsiortinneqarnera. Siornatigut qimussimik aqqutaasimagaluartut sumiiffiit ilaanni ullumikkut atorsinnaajunnaarsimaput, taamaalillutik piniartarfimminnut ilaatigut allakkut aqqutissarsiortariaqartarsimallutik, Lene Kielsen Holm nassuiaavoq.

Lene Kielsen Holm nunat tamalaat issittumi ukiorititaannut atatillugu paasissutissanik katerseqataasimavoq.

Suliniummut ataillugu Canadami nunaqarfiit ilaanni paasisanik allaaserinnillutillu nunap immallu assinginik sumi allanngortoqarneranik takussutissaqarfinnik nalunaarsuisoqarsimavoq. Aammalu Qaanaami piniarnermik inuussutissarsiuteqartut pingasut, angut utoqqaq Savissivimmeersoq, angut inuusuttoq Qaanaameersoq, arnarlu inuusuttoq aalisartutut Qaanaami inuussutissarsiutilik apersorneqarsimapput. Piniartunik Alaskameersunik Canameersunillu Qaanaami aamma naapeqatigiisitsisoqarsimavoq, immap sikua silallu pissusaata siornatigumtu naleqqiullugu allannguutai oqaluuserineqarsimallutik.

Silap pissusaa pillugu ukiarmi 2008-mi ataatsimeersuarnermi saqqummiussat allaganngorlugit saqqummiunneqassapput.

- 2010-mi atuaganngorlugit saqqummiunneqassapput, atuarneqarsinnaassallutik issittumi siku pillugu ilisimasat assigiinngitsut katersorneqarnerisa inerneri. Soorunami silap pissusaata allanngoriartornerata kingunerisaatut takorloorneqarsinnaavoq, siunissami allaat sikussaavinnissaa, Lene Kielsen Holm oqarpoq.

Ilisimasat ullumikkut pigeriikkat allaaserineqanngippata katersorneqarnatillu siunissami sikumut tunngasunik ilisimasaarunnissaq takorloorneqarsinnaasoraa.

- Kingulissatsinnut pissaqartitsissagutta, kulturittami aamma tunngavigimmagu, ilisimasat tamakku iluaqutaasussatut takorloorpavut, Lene Kielsen Holm naggasiivoq.

Ilisimatitsissutigisuinnaavarput Ilimmarfimmi ataatsimeersuarneq Nuummi innuttaasunit tamanit peqataaffigineqarsinnaammat. Ullumilu nuannersumik amerlasuutillu peqataaffigineqarsimavoq. Katuamut Ilimmarfimmut bussiussisoqarpoq.