Issittoq pillugu Folketingi suliniuteqalerpoq

- Issittup nunarsuatsinnit soqutigineqartorujussuulernerani, Folketingi Issittoq pillugu suliniuteqartariaqariaqarpoq ersarissumik pilersaarusiorluakkamillu. Folketingip suleqatigiisitamik pilersitsinissaa qangali anguniartuarpara, tamannalu tassa maanna piviusunngorpoq nuannaarutigigaakkannik, Sara Olsvig tusagassiutinut nalunaarumminni ilaatigut taama allappoq.

Aamma allalluni, Folketingip suleqatigiinnik pilersitaata, nunat Issittumi sineriallit Inatsisartuisa taamatullu Issittoq pillugu Isumalioqatigiisitap suliaannut malinnaanerunissaq, tassami Folketingi tassani issiasuutitaqareermat.

Tassani malinnaanerunissap saniatigut, Nunatsinni Inatsisartunut Savalimmiunilu Lagtingimut maannamut qaninnerusumik attaveqarnissaq sulissutigineqassasoq, Sara Olsvig allappoq.

- Suleqatigiisitap suliassaasa ilaat tassaassapput, inuiaqatigiit siuarsarneqarnerat imminut akilersinnaasoq, nunanik tamalaanik suleqatiginninneq soorlu nunarsuatsinni tamani politikkikkut ingerlatsineq eqqarsaatigalugu suliat malinnaaneq, inuussutissat pillugit sillimaniarneq aamma Issittumi silap allanngortiartorneranut tunngassuteqartut, Sara Olsvig allappoq.

Folketingip Nunat Avannarliit Isumalioqatigiissitaata immikkoortuani, suleqatigiissitaq nutaaq inissisimassaaq arfineq marlunnillu ilaasortaqassalluni.

Issittoq pillugu Folketingip suleqatigiissitaani ilaasortat tassaapput: Sara Olsvig (IA), Doris Jakobsen (Siu.), Sjúdur Skaale (JF), Finn Sørensen (EL), Per Stig Møller (K), Mikkle Dencker (DF) aamma Villum Christensen (LA).