Issittoq pillugu atuagaateqarfik qulakkeerneqarpoq
Ilisimatusarnermut ministeri Helge Sander, folketingip Kalaallit Nunaannut tunngasunut ataatsimiititaliaani, ullaap tungaani ammasumik isumasioqatigineqarmat tamanna paasinarsivoq. Folketingimut ilaasortap Juliane Henningsenip Helge Sander aggersarsimavaa, Nunarput issittorlu pillugit ilisimatusarnermi pigineqartut, maannamut Illu Atlantikumi ataatsimoortinneqartut attatiinnarneqarnissaat anguniarlugu qanoq iliulersaarnersoq paaserusullugu.
Ilisimatusarnermut ministeeriaqarfimmi issittumut tunngasunik ilisimatusarnermut ingerlatsivinni allanngortiterisoqarnerani ingerlatsiviit Illu Atlantikumiittut, illumi ataatsimoorussami tassaniiginnarnissaat akissaarunneqarsimagaluarpoq, tamannalu tunngavigalugu Juliane Henningsen Helge Sanderimut saaffiginnissuteqarpoq.
Piffissaq kingullerpaaq atorlugu illumik attartorusuttunik allanik nassaartoqarmat, issittumut tunngasunik atuagaateqarfik illumiiginnarsinnaanngorpoq.
- Isumaqatigiinniarnerit aallartinneqareersut Helge Sanderip uppernarsarpaa, ilisimatusarfiillu pigiinnarneqarsinnaanerannut neriuuteqarpoq. Tamanna tusarluarnarpoq, taamaattumik taamatut nalunaaruteqarnera tusaatissatut tiguara, Juliane Henningsen Radioaviisimut oqarpoq.
Folketingip Kalaallit Nunaannut tunngasunut ataatsimiititaliaani ullumikkut ataatsimiinnermi Juliane Henningsen Lars-Emil Johansen taarserlugu siulittaasuulerpoq.