Issittoq Folketingimi oqaluuserineqartoq

Issittoq pillugu 2013-imut nassuiaat Folketingimi kinguaattoorfiungaatsiaraluarluni ippassaq oqallisigineqarpoq. Nunanut allanut ministeriusimasup Villy Søvdahlip napparsimanera pissutigalugu nassuiaat kinguartinneqarsimavoq.

EU-p puisit amiinik eqqusseqqusinnginnera ilaatigut oqallisigineqarpoq. EU-p eqqusseqqusinnginnerata qaqileqqinneqarnisaa Steen Gadep SF-imeersup siunnersuutigaa, Sara Olsvigillu IA-meersup partiit oqaaseqartartuisa arlallit kalaallit puisinniartarnerannut tunngatillugu qanoq isumaqarnersut apeqqutigaa.

- Peqqussummi immini kukkunerulluinnarpoq. Nunanut allanut ministerimut sakkortuumik kaammattuutigissavara peqqussummut tunngatillugu paasissutissat toqqammavigineqartut nutarterneqarnissaat sulissutigeqqullugu, siunissami aalajangiinerit peqqussummillu atortitsineq tunngavissaqarluartumik ingerlanneqarsinnaaqqullugit, peqqussummi ajornarluartumik tunngavissaqarluartumik suliarineqarsimasutut oqaatigineqarsinnaanngilaq, oqaluttarfimmit taama oqarpoq.

Doris Jakobsenip oqaaseqarsinnaanermi ilarujussua amerikamiut Nunatsinni suliaannut tunngasunik paasissutissanik saqqummiisarnerup pitsaanerulersinneqarnissaanik piumasaqaateqarluni atorpaa.

- Pituffimmi sakkutooqarfiup ineriartortinneqarnerata, Kalaallit Nunaannut Folketingimullu ilaasortanut isertuussamik ingerlanneqarnera ilumut akuersaaginnassavarput, tamannami Camp Centurymut tunngatillugu pisimavoq, kingunerimi aatsaat maanna paasilerpagut. Danmarkip USA-p Kalaallit Nunaanni suliaqartitsinerani matoqqanerujussuaq unittariaqarpoq, saqqummiinermini ilaatigut taama oqarpoq.

Nunanut allanut ministerip Holger K. Nielsenip naggasiilluni neriorsuutigaa Danmarkip kalaallit puisinniartarnerat tamakkiissumik tapersersoraa, apeqqutinilu Issittumut tunngasuni Kalaallit Nunaannik Savalimmiunillu sapinngisamik annertunerpaamik peqataatitsisarnissaq danskit naalakkersuisuisa anguniartuassagaat:

- Kalaallit ilaasortaatitaannut, Kalaallit Nunaannilu Savalimmiunilu maanna tusarnaartunut oqaatigissavara, Kunngeqarfiup Kalaallit Nunaannut Savalimmiunullu attuumassuteqartunik aalajangiisarnerini kalaallit savalimmiullu peqataatinneqartarnissaat naalakkersuisut tungaannit pingaartittupilussuugatsigu.

USA-mut tunngatillugu ammanerunissamik pisariaqartitsisoqarnersoq aperineqarami, naatsumik erseqqissumillu akivoq:

- Aap, taamaalluinnarpoq.