Issittoq filmfestivalit anginersaanni immikkut sammineqalersoq

Filmilianik Tysklandip illoqarfiisa annersaanni Berlinimi ukiumoortumik nittarsaassinersuup Berlinalep saniatigooralugu saqqummersitsiviani Berlinale NATIVe-mut takusassiatut pilersaarutaa ippassaq ataasinngornermi saqqummiunneqarpoq.
Assi © : SUME-dokumentaren
januaarip 17-at 2017 06:25
Nutserisoq Mads Lynge

Kalaallit filmiliaat pingasut Berlinale NATIVe-p februaarip ulluisa qulingiluaanni ammarneqarnerani takutinneqassapput. Kalaallit Nunaanni filmiliortartut kattuffiata Film.gl-ip tassunga atatillugu Berlinimut aallartitaqassaaq.

67-issaa Berlinimi Berlinalemik taallugu filmfestivalertoqassaaq, filmilianillu Berlinimi isiginnaariartartut amerlassutsimikkut nunarsuarmi filmfestivalit akornanni amerlanerpaapput.

Issittoq Berlinalertoqarnerani immikkut sammineqassaaq, Canadap avannaani, nunani avannarlerni Saamit najugaqarfiini, Ruslandip Issittortaani Kalaallit Nunaannilu filmiliat isiginnaarneqarsinnaassapput.

AAMMA ATUARUK Filmiliornermik pikkorissaanerit akeqanngitsumillu filmertitsineq

Filmi piviusulersaarut SUME - Mumisitsinerup nipaa, Berlinalemi ukiut marluk matuma siornatigut takuteqqaarneqarmat Europami takuteqqaarneqartoq takuteqqinneqassaaq, soorlu aamma Aka Hansenip filmilaa naatsoq HALF & HALF isiginnaariarneqarsinnaassasoq.

Taassuma saniatigut Pipaluk K. Jørgensenip Mikisoq H. Lyngellu filmiliaat The Last Walk aamma isiginnaarneqarsinnaassaaq.

Nunatsinnit Berliniliartussat tassaapput: Inuk Silis Høegh, Aka Hansen, Mikisoq H. Lynge, Nina Skydsbjerg Jacobsen, Ulrik Bang, Pipaluk K. Jørgensen, Otto Rosing, Torben Bech, Michael Bévort kiisalu Emile Hertling Péronard.