Issinnera aalisarnermut sunniuteqarpoq

Ilulissani Sisimiunilu sinerissap qanittuani aalisarneq unippoq, avataanilu sikuniarnerujussuata kilisanniarneq ajornartorsiortillugu.

Ilulissani raajanik nioqqutissiorneq uninngavoq, sulisullu raajalerigaluartut qaleralileriffimmut nuutsinneqarlutik.

Qasigiannguani sikuunera pissutigalugu angallatit qaleralinnik tulaassuinngillat, qimussinilli ullormut 2.500 kiilut tikiunneqartarput.

Sisimiuni sinerissami qanittumi raajarniat aamma sikumit akornusersorneqarput. Siku aqqutigineqarsinnaatillugu kilisaatit avataasiortut qerisunik raajanik tulaassisarput aamma raajat Nuummut tulaanneqarsimasut qerisut Sisimiunut assartornerisigut nioqqutissiorneq suli ingerlasinnaavoq.

Sinerissamut qanittumi raajarniat tulaassaat sikulersukkat Paamiuni nioqqutissiornermut apeqqutaasorujussuanngorput. Taamaattumik tunisassiorneq ullormiit ullormut nalilersorneqartarpoq.

Silasiortut naapertorlugit ukiuni 15-ini aatsaat taama kujasitsigisoq angullugu ukiormanna sikuuvoq.