Issikkallassaaq
Jørgen Thomsen DMI-mi silasiortup oqarnera naapertorlugu kitaani issersuaq Canadameersuuvoq.
- Marsip tallimaat tikillugu Nuummi agguaqatigiisillugu 18-nik issippoq, tassalu naliginnaasumiit gradinik qulinik issinnerulluni. Canadami taamak sivisutigisumik ississuaarneq ajoraluarpoq, sooq taamak issitsiginersoq iluamik oqaatigisinnaanngilara, Jørgen Thomsen DMI-mi silasiortuusoq taama oqarpoq, nangillunilu.
- Sapaatip akunneranut ataatsimut massakkut ilimasaarusiorniaruma, suli issiinnarnissaa ilimagaara. Ataasinngorpalli perlulerpat issisiut qullariaallassaaq, perlulli qaangiuppat issersuaaleqqissangatippara. Sivikitsukullammik Kalaallit nunaanni issersuaartarnera naliginnaasuugaluarpoq. Maannali ulluni qulini issersuaareerpoq, sulilu ulluni qulini taamatut issiinnarnissaa ilimanarluni. Ila issersuaartussaavusi. Jørgen Thomsen, DMI-mi silasiortoq taama ilimasaarivoq.
Issersuarlumi Royal Arctic Linep assartuutaanut kinguaattoortitsivoq.
Nunatta kujataani silarlunnera peqqutaalluni Aqqaluk Ittuup pajuttuiartorluni angalanissaa tallimanngornermi marsip qulingiluaanut kinguartinneqarpoq.
Aamma Narsarsuaq, Qassiarsuk, Kangilinnguillu sikoqangaarmata umiarsuarnik tulaffigineqarsinnaanngillat. Igalikumullu pajuttuinissaraluaq aamma unitsiinnarneqartariaqalersinnaavoq.
Arsummiulli, Eqalugaarsummiut, Saarlormiullu pajuttorneqarnissaanut suli periarfissaqarput.
Umiarsuaq Aalborgiliartussaq Mary Arctica Narsami tulaqqavoq, aatsaallu silarlukkunnaarpat Danmarki toraarlugu aallassalluni.
Nunaqarfinnik pajuttaatit Angaju Ittuk aamma Johanna Kristina nunatta qeqqani pajuttuinissaraluat sikoqarpallaarnera pissutaalluni unitsikkallarneqarputtaaq.
Pajuttaatilli qanoq pissanersut Marsip 13-ianniit erseqqinnerusumik paasiniarneqarsinnaalerumaarput.
Royal Arctic Linep nittartagaanni www.ral.gl -imi pajuttuinissamut pilersaarutai nutaat alakkarterneqarsinnaapput.