Issiavik kissalaartoq nalornissutaavoq!

Namminersorneq pillugu kalaallit/danskit isumalioqatigiissitaanni Kalistat Lund siulittaasunngussanersoq suli nalornissutigineqarpoq.

Naalakkersuisut siulittaasuata, Hans Enoksenip, Danmarkimi ministeriuneq, Anders Fogh Rasmussen, apeqqut taanna pillugu januaarip ulluisa qulinganni ataatsimeeqatigissagaa, Hans Enoksen Sermitsiamut oqarpoq.

Inatsisartunut novemberip ulluisa 15-ianni qinersinermi, Kalistat Lund qinigaaqqinngitsoorpoq, soorlu aamma isumalioqatigiissitami ilaasortat allat marluk, Per Rosing Petersen aamma Aqqaluk Lynge qiningaaqqinngitsoortut.

Per Rosing Petersen aamma Aqqaluk Lynge taarserneqarput, Namminersorneq pillugu Isumalioqatigiissitami nutaatut ilaasortanngorlutik Ruth Heilmann, Siumut, aamma Johan Lund Olsen, Inuit Ataqatigiit.

- Siulittaasussatut piukkunnartut Inatsisartuni nutaani arlaqarput, Hans Enoksen Sermitsiamut oqarpoq.

-Aappaatigooqarporli, tassami isumaliutissiissut Isumalioqatigiissitap aappaagu ukiakkut saqqummiuttussaavaa. Taamaammat siulittaasumik nutaamik qinersigutta akilersinnaanersoq nalilertariaqassavarput. Neriuutigaara isumaliutissiissut piffissaq eqqorlugu Isumalioqatigiissitap saqqummiussinnaassagaa, Naalakkersuisut siulittaasuat qalleqqissaavoq.