Issi piniagassanut killersuivoq

Pisiniat ilaat ullut marluk  puisit neqaannik pisiniartaraluarpoq, allatut ajornartumik iffiartuinnartariaqassaaq.
Kalaalimineerniarfimmi tunisassianik amigaateqartoqartillugu sulisut pisuutinneqaqqajaasarput.

Jakobine Poulsen Kalaaliaqqami puisip neqaanik pisiniaraluartoq ippassaq naapipparput, taanna puisitorusukkaluarluni ullut kingullit marluk kalaalimineerniarfimmut puisip neqaanik pisiniartaraluarpoq soqanngimmallu ingerlaqqiinnartariaqarluni. 

Kalaaliaqqami tunisassiat ulluni kingullerni tassaapput mitit aalisakkallu.

Issinnerujussua pissutigalugu Kalaaliaqqami tuniniarneqarsinnaasut amigaatigineqartut tassapput puisit neqaat aalisakkallu, Kalaaliaqqami aqutsisoq Andreas Kleischmidt oqarpoq.

Kalaaliaqqami nioqqutissat amigaatigineqartillugit, Kalaaliaqqami sulisut pisinianit pisuutinneqaqqajaasarput.

-Pisiniat paasitikkuminaattarput, allaanngiivippoq sulisut pisuusartut Kalaaliaqqami tunisassiaqanngikkaangat, Andreas Kleinschmidt oqarpoq.

Sikuniarnerujussua issinerujussualu pisinianut nassuiaassutigineqaraangata pisiniat tamanna paasisarpaat, Kalaaliaqqami aqutsisoq oqarpoq.

Sejer Markussen kalaalimineerniarfimmi kalaaliminernik ulluinnarni tuniniaasarpoq, tuniniartagai ulluni kingullerni amerliartunngillat.

- Issinnerujussua pissutigalugu Kalaaliaqqami tuniniartakkat ajoraluartumik ikiliartorput, aalisartut piniartullu angallataat sikkussaasimagamik, Sejer Markussen oqarpoq.

Kalaalimineerniarfimmi nioqqutissat ikikkaangata matoqqasariaqartarpoq, Sejer Markussenillu neriuutigaa tamanna pisinianit paasineqarumaartoq, suuteqaratik ammasariaqannginnamik.

Matoqqasariaqartarnera pisinianut nassuiarniarneqartarpoq, tamannalu pisinianit paasineqartartoq, Kaalaalimineerniarfiup aqutsisua Andreas Kleinschmidt oqarpoq.

Jakobine Poulsen puisip neqaaanik ulluni kingullerni pisiniarluni kalaalimeerniarfimmukartaraluarpoq. Pisiassaqanngimmat  allanik nerisariaqassaaq, immaqagooq iffianik imaluunniit allanik.