Issersuarmit ajunaartorpassuit

Europami ulluni arlalissuarni nittaalartalimmik anorersuarlunilu isserujussuarmat inuit ikinnerpaamik 80-it ajunaarsimasut, Danmarkip Radioata nittartagaani ullaaq manna atuarneqarsinnaavoq.
decembarip 22-at 2009 07:34

Polen eqqugaanerpaavoq - inuit 42-t ullut pingasut ingerlaneranni tamaani qiullutik toqusimapput. Minnerpaamik 20-nik issimmat Polenimi Politiit innuttaasut kajumissaarpaat, angerlarsimaffeqanngitsut, inuillu maaniinnaq artuleqqasut, siniliinnarsimasulluunniit, ikiortaqqullugit.

Ukraine aamma issittorujussuuvoq, inuit 27-t tamaani ajunaarsimallutik.

Inuit katillugit 13-it Østrigimi, Finlandimi Tysklandimilu aqqusinikkut angallannermi ajunaarsimapput, tamaani 33-t tikillugit ississimalluni.

Pingaartumik Europap avannarpasissuani aperujussuarsimavoq issittorujussuullunilu, silaannakkut angallanneq, qimuttuitsullu angalanissaat taamaatiinnartariaqartarput, aqquserngillu sumi tamaani matoqqapput.

Danmarkimi nittaalartalimmik anorersuarnissaa silasiorfiit ullumikkut aarlerisaarutigigaat, aviisimi Jyllandspostenimi ullaaq manna atuarneqarsinnaavoq.