ISS ujaqqanik erlinnartunik isumannaallisaavoq

Isumaqatigiissut naapertorlugu Qeqertarsuatsiaat eqqaanni Rubininik piiaavimmi aamma suliffeqarfiup Nuummi maanna suliaannik siunissamilu suliariumaagassaannik isumannaallisaaneq ISS-imit isumagineqassaaq.

Ujaqqanik erlinnartunik tunisassiornermut atatillugu qaffasissumik inissisimasumik isumannaallisaanissami periaasissaq anguniarlugu isumaqatigiissuteqartut Securitas Danmarkimik suleqateqarsimapput.

Tamatuma kinguneraa, nakkutilleeriaatsimik nutaarluinnarmik ineriartortitsisoqalernera, ilaatigut qarasaasiamit aqunneqartumik nakkulliisoqassalluni, piiaaffiup eqqaani pasinarsinnaasumik pissusilersortut ingerlaannartumik nalunaarsorneqarsinnaassallutik.

Taama aaqqiineq Securitas Danmarkimi pisortap Kim Høybjerg Andersenip piiaalluni tunisassiornermi isumannaallisaanermi siuttuulertussatut isigineqartoq oqaatigaa - aamma nunat tamalaat akornanni.