Israelip sakkutuui Gazamut isernissamut piareersimapput

Ulluni kingullerni sisamani Israelimiut timmisartunik sorsuutinik sinerissamut Gazamut saassussisarnerat, sakkulersorluni saassussisarnissat “siulliit ilagiinnarpaat”.
decembarip 30-at 2008 08:40

Tassami amerlanerusunik saassussisarnissat Israelimiut isumannaallisaanermut aqutsisoqarfianit akuersissutigineqareermata. Israelimiut ministeriunerat Ehud Olmert Israelip præsidentianut Shimon Peres-imut ullumi taama ilisimatitsivoq.

Israelip sakkutuuinit oqaaseqartitaq nutaarsiassaqartitsivimmut AFP-mut oqarpoq, sakkutuut Gazamut isaanissaminnut piareersimasut, naalakkerneqarnissartillu utaqqiinnaraat.

- Sakkutuut nunasiortut piareeqqapput. Aamma allat tamarmik piareersimapput, Gazamullu isaanissaq periarfissaavoq. Imaassinnaavoq isaaffigigipput, maannakkorpiarli timmisartut immakkullu sorsuutit atorlugit saassussisarnivut ingerlatiinnassavavut, sakkutuut oqaaseqartitaat oqarpoq.

Ullumi siusinnerusukkut sakkuaakkunnaartoqarsinnaanera Israelimit itigartitsissutigineqarpoq, tamatumunnga taarsiullugu Hamasikkunnut akiuunneq sapaatip akunnerinik arlalinnik sivisussuseqarsinnaasoq oqaatigineqarluni. Tamanna Israelimi illersornissamut ministerip tullersortaanit uppernarsarneqarpoq, taanna aamma oqarpoq, sakkutuut sapaatip akunnerini arlalinni saassussisarnissartik piareersimaffigigaat. Nutaarsiassaqartitsivimmi Ritzauimi taama allaaserinnittoqarpoq.