Israelip Hamas nukillaarsalerpaa

Palæstinami qinersinermi ajugaasut Hamasimeersut Israelip naalakkersuisuisa Palæstinap namminersornerullutik ingerlatsisui aningaasatigut nukillaarsalerpaat; siunertarigunarlugu innuttaasut Hamasimik tunutsinissaat.

Januaarimi Palæstinami inatsisartunut qinersinermi partii Hamas peqqarniisaarnianut attuumassuteqarsorineqartoq, taasisunit amerlanerussuteqarluartunit taaguunneqarluni aqutsisussanngorpoq; aqagulu Palæstinap inatsisartuisa ammaanersiornissaat silarsuup naggatissaatulluunniit Israelip naalakkersuisuisa isigaat.

Israelip naalakkersuisuini siulittaasuugallartup Ehud Ohlmertip palæstinamiut akileraarutitigut Israelimut akiliutigisimasaasa utertinngitsoornissaannut qanoq suliariaaseqarnissi pilersaarusiuleruttorpaa.

Palæstinami namminersornerullutik oqartussat oqartussaaffeqarfiini 140.000t sulipput, taakkunannga angutit sakkullit 60.000t. Taakkorpiaappummi Israelip naalakkersuisuisa aningaasatigut eqqorniagaat. Palæstinamiut nunaata arlaani Gazamiit Israelimut ikaarsaariarfia Israelimiut assernialersaarpaat, suliartortussat Israelimut appakaassinnaajunnaarlugit.

Inuinnaat Israelimiut neriuutigaat tulliani Palæstinami qinersineqalerpat Hamas taaneqarpallaassanngitsoq – partiimi taanna Israelip suujunnaarsilluinnarnissaanik siunertaqarmat, inuiaallu marluiit akaareqatigiinnerulernissaannut akornusiillutik.

Palæstinap naalakkersuisoriligassai Hamasimit siuttuffigineqartussat, Israelip naalakkersuisorigallagaanit, naalagaaffinnut ajussutsimik aqunneqartunut ilanngunnerarneragaapput.