Israelip Gazamik mattussinini ullumi minnerulersippaa
- Tamannami tassaavoq innuttaasunik millionit aappaata affaanik amerlassuseqartunik ataatsimoortumik pillaaneq, Palæstinamiut isumaqatigiinniartitaasa siuttuat oqarpoq.
Henrik Stubkjærip ikiuiniaqatigiiffimmit Folkekirkens Nødhjælpimeersup, Gazamut ikiuiniarnermik ukiuni arlalinni ingerlatsisimasup, tamanna isumaqatigaa. Mattussinerup killilimmik atorunnaarsinneqarnera ajunngilaq, tamannali naammanngilaq, Henrik Stubkjær oqarpoq.
- Pillaatitut iliuuserineqartut sakkukilliniarneqarnerannik nalunaarut nalunaarutaavoq nuannersoq, aammalu alloriarnerulluni pisariaqartinneqartoq siulleq, Gazami maannakkorpiaq pissutsinik nalorninartorsiornartunik akiuiniarnerput aallartissinnaassagutsigu.
Israelip Gazamiit nioqqutissanik annisseqqusinnginnera qanoq kinguneqassanersoq Henrik Stubkjær aperineqarami akivoq:
- Aap, tamanna ajornartorsiutaavoq annertooq, nioqqutissat ikiuutissat, nakorsaatit, imeq, sanaartornermullu atortussat eqqussinnaanngussavavut. Kisiannili Gaza ilumut sanaqqinniassagutsigu, illut napparsimmaviillu inuiaqatigiinnilu atortut sanaqqillugit, aammattaaq avammut annissinissamut pillaatitut iliuuserineqartut sakkukillisittariaqarpavut, inuussutissarsiuteqarneq annertusaavigineqassappat suliffissaaleqinerlu maannakkut 80 procentiusoq akiorniarneqarluni, taava suliffissuaqarneq avammut tunisassiornissamut periarfissalik ammaattariaqarparput. Taava pillaatitut iliuuserineqartut atorunnaarsinneqavinnissaat piumasarisariaqalerparput Gaza sanaqqinniassagutsigu. Immaqa tamatumani nunanit tamalaanit alaatsinaatsitat isumaginnissinnaapput killeqarfimmilluunniit nakkutilliisuutitat inissitsiterneqarlutik sakkunik eqqussisoqannginnissaa qularnaarluarumallugu, tamatumunngalu peqatigitillugu nerisassat nakorsaatit nioqqutissallu allat eqqussorneqarlutillu annissorneqarlutik, tamannaasinnaavorlu alloriarneq siulleq maannakkut iliuuserineqarsinnaasoq, DR taama ilanngutassiivoq.
