Israelip aallartitaa: IWC-imi suleqatigiissinnaavugut

Israeli arfanniartarnerlu imminnut atassuteqarpat ?

Ila soorlu imminnut atassuteqassanngitsut, taamaattorli arfanniarneq pillugu ataatsimiitsitaliarsuarmi IWC-imi Israel ilaasortanngoqqammerpoq. Ataatsimiititaliarsuarmi ilaasortat ukiumoortumik ataatsimiillutik ullumi aallartipput. Japanimiut aningaasarsiutigalugu arfanniartarnerup akuersissutigineqarnissaa ataatsimiinnermi saqqummiutissappassuk ilaasortat imminnut tigunngujoorlutik oqallisissagunarput.

IWC-mi ilaasortat ataatsimiileriannguartut Israelip Danmarkimut aallartitaa sapaatip akunnerani uani nunatsinnut tikeraarpoq.

Israel sooq arfanniarneq pillugu ataatsimiititaliarsuarmi ilaasortanngorsimanersoq aallartitamut David Walzerimut radioavisimiit apeqqutigaarput, ima akivoq:

- Arfanniartartuunnginnatta imaanngilaq ikiuussinnaanngitsugut. Ilisimatusaatigalugu arfanniarnermi ikiuulluarsinnaavugut, aallartitaq David Walzer oqarpoq nangipporlu:

- Israel ukiorpassuarni nunanit tamalaanit killilersuiffigineqarnini peqqutigalugu nunanik allanik suleqateqarsinnaanera killeqarnikuuvoq. Massakkulli pissutsit allanngorput taamaattumik sapinngisamik amerlanerpaanik nunarsuarmioqatitsinnik naapeqateqartarnissarput pingaartipparput, David Walzer oqarpoq.

Israel qanittukkut arfanniarneq pillugu ataatsimiititaliarsuarmi nunat ilaasortaatitaqartut 70-issaattut ilaasortanngorpoq. Naak ilaasortanngoqqammigaluarlutik Israelimiut arfanniarneq pillugu ima isummersorput:

- Uumasut nungutaannginnissaat suliniutigiuartariaqarparput. Taamaakkaluartorli qangarsuaaniit arfanniartartut, puisinniartartut aalisartulluunniit ileqqui mianersuuttariaqarmata taakku piniartuarnissaat aamma eqqarsaatigisariaqarparput, aallartitaq David Walzer oqarpoq.

Aningaasarsiutigalugu arfanniartarneq taasissutigineqassagaluarpat Israelimiut ilaasortaatitaat qanoq taasissanersut aallartitap David Walzerip oqaatigisinnaannginnerarpaa. USA-mi EU-milu ilaasortat malinnaaffigalugit Israelip itigartitsinissaa ilimanateqarpoq.