Israelimiut sakkutuui peqqarniisaarniatut pissusilersorput
Israelimiut nakorsaasa sakkutuut qullersaqarfiat maannakkut aamma unnerluutigaat. Gazami sorsunnerup nalaani palæstinamiut ikilerneqarsimasut inuillu illut isaneranni mattussaasimasut ikiornaveersaaginnarnagit, aammali palæstinamiut nakorsaat peqqissaasuilu ikiorsiinaveersaartissimammatigik, israelimiut nakorsaasa sakkutuut qullersaqarfiat ullumi nalunaarusiaminni sakkortuumik isornartorsiorpaat.
Nunat tamat sorsunnerit nalaanni pissusilersornissaq pillugu isumaqatigiissusiaanni ikilerneqarsimasut allatullu ikiortariallit pingitsooratik ikiorneqartussaagaluarput. Røde Korsimiit ikiuiniartut sumiluunniit sorsuuttut illuatungaannaannik isornartorsiuinaveersaartaraluartut, Gazami sorsunnerup nalaani israelimiut pissusilersorneri, maannakkut israelimiut sakkutuuinit nakorsaannillu uppernarsarneqartut, taamanili avoqqaarisarpaat.
Israelimiut nakorsaat avoqqaarinnittut imminnut taagorput; ”nakorsat inuit pisinnaatitaaffiinik tapersersuisut”. Taakkua Naalagaafiit Peqatigiit nalunaarusiaannut tapitartuullugu oqaluttuarput, palæstinamiut nakorsaat ambulancenillu ingerlatsisut 16-it israelimiut saassusseqattaarneranni toqutaasimasut. Napparsimmaviit peqqissaasoqarfiillu 34-t qaartartunit aamma eqqorneqarput.
Israelimiut nakorsaasa avoqqaarinnillutik taamatut saqqummiinerat pivoq, sakkutuut sorsunnerup nalaani sakkutuujungitsunik toqoraasarsimanertik illunullu isaallutik sequtserisarsimanertik, tamakkualu naalakkiissutigineqartarsimasut oqaluttuarisimatsiaraat. ”Nakorsat inuit pisinnaatitaaffiinik tapersersuisut” nalunaarusiaminni aamma palæstinamiut sakkulersorniartortaat, Hamasimeersut, avoqqaaraat. Taakkuami sorsunnerup nalaani napparsimmavinni toqqorsimaarniartuarsimapput, ambulancillu sakkunik angallassissutiginiartuarsimallugit.
