Israelimiut sakkutuui kanngunarluinartumik pissusilersorsimapput

Januaarimi qanoq pisoqartarsimanera taamani sakkutuut sorsoqataasut sakkutuunut nutaanut saqqummiussaanni atuarneqarsinnaavoq. Taamani sorsoqataasup soorlu oqaluttuaraa, arnap utoqqaap aqqusinersuaq ikaaleraa aallaasimallugu, tamannalu pisimasoq sakkutooqatigiit naalagaaraannit ersarilluinnartumik naalakkerneqarnerup kingorna. Sakkutuup nammineq toqutsineq migitsaattutut inuarnermik taavaa. Sakkutooq alla oqaluttuarpoq, illu ataaseq tigualeramikku inoqutigiit suaarneqarsimasut illumiit anigunik talerpimmut qimaassasut, arnarli marlunnik meeqqisartoq paatsiveerulluni saamimmut qimaalermat, tamarmik aallaaneqarsimasut. Sakkutuut oqaluttuarput illunut iserniarlutik matu aseroriarlugu ingerlaannaq ilummut aallaarsarinnittassallutik, iserteraangamillu sequtserisassallutik naalakkerneqarsimallutik. Israelimiut sakkutuui oqaluttuarput, Palæstinamiut inuuneri nammineq inuunerminnit nalikinnerusutut nalilerneqartartutut misigisimallugu. Palæstinamiut 1000-it sinnillit sorsunnermi toqutaapput, taakkua pingasorarterutaat meeraapput, toqutaasullu amerlanersaat sakkutuujunatik. Sakkutuut qullersaqarfiannit manna tikillugu pissuserissaarlutik naapertuilluarlutillu sorsunneq ingerlassimallugu oqaatiginiartaraluarpaat, sakkutuulli maanna saqqummiussugaasa kingorna taamatut oqartarneq attatiinnaruminaassaaq. Naalagaaffiit Peqatigiit inuit pisinnaatitaaffii pillugit misissuisoq oqarpoq, Israelimiut sorsunnerup nalaani pinerlussimasutut, kanngunarluinartumillu pissusilersorsimasutut oqaatigisariaqartut.

Haagimi unnerluussissuserisup sorsunnerup nalaani qanoq pisoqartarsimanersoq misissortikkusullugu, soorlu qaartartut fosforimik qaqortumik imallit atorneqartarsimaneri pillugit, paasiniaatitserusulluni sapaatip akunnerata aallartinerani nalunaarutigaa.