Israelimiut sakkutuui Gazamut isaajuarsinnarput
Israelimiut illoqarfii Gazap ungasinngisaaniittut Gazamit raketinik saassunneqarunnaarneqarnissaasa tungaanut sakkutuuliisoqassasoq, Israelip illersornissamut ministeriata Ehud Barakip oqaatigaa.
Gazap illoqarfittaani unnuaq ullaallu tungaani sakkuaattoqarmat Palæstiinamiut ikinnerpaamik aqqaneq-marluk toqutaapput.
Toqutaasut ilaat tassaapput meeqqat pingasut ilaqutariillu arfineq-marlunnik inuttallit. Tusarfiit Palæstiinami napparsimmavinneersut tusagassiuutinut taama ilisimatitsipput.
Israelimiut sakkutuui Gazap illoqarfittaaniittut timmisartunit umiarsuarniillu ikiorneqarput, Israelimiut umiarsuaat Gazap sineriaata avataani maanna piareersimatinneqarmata.
- Gazami anguniakkavut suli arlaqarput, taamaammat suli Gazamiikkallassaagut, Ehud Barak oqarpoq.
Gazami qanoq iliuuseqartoqarnersoq paasiniassallugu ajornakusuussaaq, tusagassiortut nunanit allaneersut Gazamut iseqqusaajunnaarsinneqarnikuummata. Taama aalajangiisoqarpoq, naak Israelimi eqqartuussiviit qullersaata aalajangereeraluaraa tusagassiortut qulit tikillugit ikiorsiinissamut atatillugu Gazamut eqqussisoqaleraangat ilaasinnaassasut.
Israelimiut oqarput isumannaallisaaniarneq peqqutigalugu tusagassiortut Gazamut isersinnaatitaanngitsut.
Inuit pisinnaatitaaffii pillugit kattuffik Human Rights Watch Israel pillugu naammagittaalliuteqareerpoq, tusagassiortut alaatsinaattullu Gazamut isersinnaatitaasariaqarnerat ujartorlugu.
