Israelimiut sakkutuui Gaza-mi saassussisaqattaarput
Israelimiut sakkutuui Gazamut iseriarlutik aalajangersimasunik saassusisaqattaarput.
Timmisartut qulimiguullit qamussuillu atorlugit Palæstiinap killeqarfianut isaapput. Isaanermut peqqutaatinneqarpoq israelimiut sakkutuuata inuusuttup sapaatiummat aallarunneqarnera.
Israelimiut ullaarli Gazamut isaagamik Hamasikkut sungiusartarfiannik, palæstinamiut saassusisaqattaartarfiinik innaallaagissiorfinnillu qaartartumeerisaqattaarput.
Israelimiut qamussui Gazap kujasinnerusortaani suli piareersimatinneqarput. Taakku illoqarfinnik tamaaniitunik qimarnguinnillu saassussissagaluarunik sakkortuumik akineqarnissartik naatsorsuutigissagaat israelimiunit immikkut ilisimasalinnit eqqoriarneqarpoq.
Israelimiut innaallagissiorfimmik ullaaq qaartitsinerisa kingunerisaanik Gazami innuttaasut 1,4 millionit imeqaratillu innaallagiaqanngillat. Tamaanilu napparsimmaviit orsuerunnissamik tungaanut innaallagiaqarlutillu imeqarallarput.
Israelimiut Hamasikkullu suli najummassimanartorsiorput. Hamasimit nalunaarutigineqarpoq israelimiut iliuuseqarnissaat apeqqutaasut sakkutuup aallarunneqartup inuuinnarnissaanut.
- Sakkutooq aallarunneqartoq iperagaatinniarlugu sakkortuumik saassussisaqattaarsinnaavugut taamattorli Gazamik tiguaanissarput anguniarusunngilarput, Israelimiut ministeriunerat oqarpoq.
Kangiani qiterlermi ullumikkut ulloq assut najummassimanartuusimavoq.
Israelimiut timmisartortitseqatigiivisa timmisartut sorsuutit Syria qulaatsissimavaat, timmisartorlu ataaseq præsidentip illorsua Damaskusimiittoq qulaakkamiuk, Syriamiunit eqqaanneqarsimavoq.
