Israelimiut Palæstinamiullu akornannni ataatsimiisitsisoqalerpoq
USA sivisuumik utaqqisitsereerluni israelimiut palæstinamiullu akornanni eqqisseqatigiinnissaq anguniarlugu kiisami ataatsimiisitsisussanngorpoq.
Palæstinamiut immikkut nunaqalissappata nunarpassuit piumasaat soqutigisallu assigiinngitsorpassuit isiginiarneqaqqaartussaapput, taamaammallu USA-p ataatsimiisitsinermik piareersaanera imaannaanngilaq.
Ataatsimiisitsinermi peqataasussat allattorsimaffiat suli naammassinngilaq, pingaarnerpaalli ilaattut peqataassapput Syriap aallartitai.
Syriamiulli ataatsimiinnermi Marylandimi ingerlanneqartussami peqataassagunik piumasaqareerput, taamalu Israelimiut Palæstinamiullu eqqisseqatigiinnissamik isumaqatigiissuteqarnissaannut Syriamiut aporfiunerpaasinnaapput, isumaqatigiissuteqanngitsoortitsisinnaagamik piviusunngortitsingitsoorsinnaallutilluunniit.
Hamas-ikkut, palæstinamiut sakkulersorlutik akiuuttartoqatigiivi Syriap illoqarfiisa pingaarnersaanni Damaskusimi allaffeqarput, tassanngaanniillu Israelip ilaani Gazami pisunik aqutsillutik.
Syria imaassinnaavoq amerikamiunut piumasaqartoq.
Syriammi naalakkersuisuisa piumasarissagunavippaat, Golanip qaqqartai, Israelimit 1967-imi tiguarneqartut. Golanip qaqqartai eqqisseqatigiinnissaq anguniarlugu ataatsimiisitsinerni ukioq 2000-imi aamma ukioq 2005-imi eqqaaneqartaraluarput, kinguneqanngitsumik.
Taamaammat USA-p Golanip qaqqartaanut tunngasut tunuarsimaarfigissagunarai, Kangiani Qiterlermi eqqisseqatigiinnissaq anguniarlugu USA-mi ataatsimiisitsinissami ilimagineqalereerpoq, taama Danmarkip Radioa tusagassiivoq.
USA-p neriorsuutigisimagaluarpaa Kangiani Qiterlermi nunanit peqataaffigineqartumik ataatsimeersuartitsinissaq, maannali nunat ikittunnguit peqataaffigisaannik USA-mi ataatsimiisitsisoqassasoq, tusarfiit oqaatigaat.