Israelimiut palæstinamiullu akersuuteqqilerput
Israelimiut ippassaq unnukkut ullumilu Gazami saassusseqattaarput, paasisallu kingulliit malillugit palæstinamiut 13-it toqutaasimallutik.
Allattoq Najaaraq Egede
Israelimiut saassusseqattaarneri qaammatit arlallit ingerlanerini aatsaat taama sakkortutigaat, islamisiortullu ingasaassiniat, Hamasimeersut Gazamiit rakettit atorlugit saassusseqattaarnerannut akiniutaallutik.
Toqutaasunut ilaavoq Israelimiunit sakkulersorniat siuttuisa ilaattut isigineqartoq.
Islamisiortut Jihad tusagassiortunut e-mailikkut nalunaareerput imminnut toqoriaatigalutik qaartartumeerisartut atorlugit Israelimiut saassusseqattaarneri akiniarneqassasut.