Israelimiut Libanonimut saassussisaqattaarput

Israelimiut timmisartut umiarsuillu sorsuutaat ulloq naallugu Libanonimut saassussisaqattaarput. Killeqarfiit, aqqusernit ikaartarfiillu Syriap killeqarfianiittut qaartartumeeriffigineqarsimapput.

Beirut-imilu peqqarniisaarniaqatigiit hizbollah-kkut qullersaqarfiat ikuallappoq. Ungasinngitsukkut hizbollah-kkut israelimiut sakkutuui marluk qimarnguppaat, maannalu israelimiut sakkortuumik akiniaallutik.

DR-p nutaarsiassaqartitsivianeersoq Jannick Kofoed hizbollah-p qullersaqarfiata eqqaani Beirut-ip kujasinnerusortaaniippoq ilanngutassiivoq:

-Suna tamarmi tujorminartorujussuuvoq nikallunganartorujussuullunilu. Nunami qaartartumeeriffikut itersarsuanngorlutik takussaapput, illorsuarnilu qaleriikkaani igalaat qaartitsisoqartarneranik ilummut naqissimapput. Inuit angerlarsimaannarput, illoqarfimmilu inunnik takussaasoqanngilaq. Soorlumi aliortukkat illoqarfigiinnaraat, jannick Kofoed oqarpoq.

Israelimiut hizbollah-kkunnut saassussinerat kangiani qiterlermi sorsuttoqalerneranik kinguneqarsinnaavoq.

Israelimiut Libanonip Syriallu killeqarfiisa ungasinngisaani ullumi saassussipput. Taamaakkaluartoq Israelimiit Syriamillu

oqaatigineqarpoq, Syriamut saassussisoqanngitsoq. Syriamummi saassussisoqaraluarpat sorsunneq aatsaat aallartilluassagaluarpoq.

Innuttaasut allamiut qimarrapput. Arlallit Syriap killeqarfiatigoorlutik qimaaniarsaripput. Danskisut innuttaassusillit 2300-t maanna Libanonimiipput, ullumilu danskit nunanut allanut ministeriaqarfianit aalajangerneqarpoq sorsuffimmit qimagutitinneqassasut.

Israelimit neriorsuutigineqarpoq danskit EU-meersullu allat ajortumeerneqarnavianngitsut, namminneq illersorumaaramikkit.