Israelimiut Hizbollah-kkunnik saassussiuarsinnarput. Libanonillu kujasinnerusortaani nunat tamat sakkutuuliippata saassusisarnitik aatsaat unitsissaagaat, Isralimiut naalakkersuisuisa siulittaasuanit Ehud Olmertimit nalunaarutigineqarpoq.
Israelimiut sakkutuui Libanonimik tiguaasut amerliartorput, Libanonimilu sakkortuumik ullaaq akersuuttoqarpoq.
- Nunat tamat Libanonip kujasinnerusortaani sakkutuuliippata saassussisarnivut aatsaat unitsissavagut, Hizbollah-kkut saassissisaqattaarfii 700-t attaveqarnerminnilu atortorissaarutaat sakkutuutsinnit aamma aserorneqareerput, Israelimiut naalakkersuisuisa siulittaasuat, Ehud Olmert, Tuluit TV-qarfiannut ullaaq oqarpoq.
Israelimiut sakkutuui Libanonimut nunakkut isaammatali nunap immikkoortui sisamat isaaffigineqarput.
Nutaarsiassaqartitsivik BBC paasissutissiinera naapertorlugu sakkutuut 1.000-likkuutaat tallimat isaatinneqarsimapput. Israelillu killeqarfiata eqqaani sorsuussuit assakaasullit sakkulersoriikkat Libanonimut isaanissaminnut piareersimasut kalerrinneqarnissaminnik utaqqiinnarput. Libanonimi kuussuaq Litani angullugu isaanissartik Israelimiut anguniarpaat. Maannamulli Israelip Libanonillu killeqarfiisa eqqaanni akersuuttoqarpoq. BBC-p alaatsinaatsitaa oqarpoq, Israelip killeqarfianit Libanonip iluani kilometerinik arfinilinnik isorartutigisoq israelimiut isumannaatsumik nakkutigilerusukkaat.
Hizbollah-kkut akiuuttuarsinnarput. Israelip tungaanut ullaaq qaartartumeeripput.
Israelimiut sakkutuuisa naalagaasa ilaat qanittukkut oqarpoq, Libanonip tungaanut silaannakkut qaartartumeerisarnitik aallarteqqimmatali illoqarfiit pingaarnersaat Beirut ilanngullugu qaartartumeeriffigerusukkitsik.