Israelimiut hizbollah-kullu aaqqiissutissanik siunnersuuteqarput

juulip 26-at 2006 17:19

Kangiani Qiterlermi akersuunnerit aaqqeeqataaffiginiarlugit nunani 15-ni innuttaasut aallartitaat Romimi ataatsimeeqatigiittut ullumi isumaqatigiissinnaasimanngillat. Suli akersuuttoqarpoq israelimiullu hizbollah-kkullu aaqqiissutissanik ullumi siunnersuuteqarput.

Libanonip kujasinnerusortaani nunaminertaq kilometerinik marlunnik annertussusilik inuiaat akersuuttut imminnut pallitsaaliniarlugit pilersinneqassasoq israelimiunit siunnersuutigineqarpoq. Hizbollah-kkut sapaatit-akunnerini marlunni kingullerni qaartartumeertagai israelimiut sakkutuuinit isumannaallisaaffigineqarlutik salinneqarput, innuttaasut ilanngullugit noorartinneqarlutik. Israelimiut naalakkersuisuisa siulittaasuata, Ehut Olmertip, nunanut allanut upalungaarsimanissarlu pillugu siunnersortini ataatsimeeqatigereerlugit taama nalunaaruteqarpoq.

Naalagaaffiit Peqatigiit massakkut sakkui sakkukippallaaqimmata israelimiuunngitsut nakkutilliisuutitaassappata sakkulersorluarneqarnissaat namminneq piumasarissallugu Olmertip nalunaaruteqarnermini erseqqissarpaa.

Hizbollah-kkut aamma aaqqiissutissanik siunnersuuteqarput. Taakku naalakkersuinermik suliaqartartuisa siunnersuutigaat, israelimiut namminnerlu paarnaarussaminnik paarlaasseqatigiissallutik. Israelimiulli naalakkersuisusa siulittaasuata tamanna akuererusunngilaa oqarluni, hizbollah-kkut akersuunnermik aallarniisut ilaannik tigusarisimasaminnik paarlaasseqateqarusunnatik aalajangersimallutik.

Illuatungeriit sapaatit-akunnerini marlunni kingullerni akersuuttarsimasut aagasannerpaamik ullumikkut akersuukkunarput. Tusagassiorfiit arlallit ullumi nalunaarput hizbollah-kkut ilaat 30-t ullumikkut toqutaasimasut. Taamatuttaaq israelimiut sakkutuui 30-t ikiligaapput. Tusagassiorfiit ilaasa tusarliuppaat israelimiut 14-t toqutaasimasut tamannali israelimiunit uppernarsarneqarusunngilaq.