Israelimiut Hizbollah-kkullu pinerluuteqarsimaneragaapput

Sakkutuujunngitsut Israelimiut hizbollah-kkullu aasap ingerlanerani akersuunnerini eqqugaanerpaapput, Amnesty Internationalip nalunaarusiaani taama allassimasoqarpoq. Israelimiut hizbollah-kkullu sorsunnermi pinerluuteqarsimallutik nassuerput.

Amnesty Internationalip aallartitaasa nunani pineqartuni eqqugaasut, qanigisaat takunnittuusimasullu tamaasa tikeraarnerminni oqaloqatigisarpaat. Hizbollah-kkut, israelimiut libanonimiullu sakkutuui aamma apersorpaat. Inuit pisinnaatitaaffiisa atuutsinneqarnissaannik suliniarfiup maanna nalunaarusiani naammassillugu avammut saqqummiussivoq. Tamanna pillugu Danmarkimi qullersaq Lars Normann Jørgensen ima oqarpoq:

- Taamatut akersuuttoqarnerani sakkutuujunngitsut eqqugaanerpaasartut nalunaarusiami atuarneqarsinnaavoq. Hizbollah-kkut sakkutuujunngitsut eqqornissaat eqqarsaatiginngivillugu qaartartunik Israelip tungaanut igeriussisarput – taamaalillutillu sorsunnermi pinerluuteqartutut taaneqarsinnaalerput. Paarlattuanillu israelimiut akiniaallutillusooq Libanonimi pinngitsoorneqarsinnaanngitsut, soorlu napparsimmaviit, atuarfiit, aqquserngit, ikaartarfiit assigisaallu ingasattajaarlutik qaartartumeeqattaarpaat. Taamatut israelimiut qaartartumeerisarnerminni hizbollah-kkut libanonimiunit inisimasorineqartarneri tunngavilersuutigaat. Taamatut akersuuttaqattaarnerni sakkutuujunngitsut eqqugaanerpaapput, Amnesty Internationalip Danmarkimi immikkoortortaqarfiani qullersaq Lars Normann Jørgensen oqarpoq.

Libanonimi Israelimilu inuit pisinnaatitaaffiinik unioqqutitsilluni akersuuttanerit suleqatigiissitanit arlaannaanulluunniit atanngitsunit misissuiffigineqarnissaat maanna Amnesty Internationalip Naalagaaffiit Peqatigiinnut piumasaraa. - Taamanikkut akersuunnernut akisussaasut taamaalillutik eqqartuussivilersuunneqarsinnaalissapput pillarneqarlutillu, Lars Normann Jørgensen oqarpoq.