Israelimiut Hamasikkullu sakkuaakkunnaarusunngillat
Taamaammat Gazami akersuunneq sakkukillerianngilaq, Israelimiullu Gazap avannarpasinnerusortaani qaartartumeereqattaarnertik ingerlattuarsinnarpaat, Hamasimeersullu qaartartunik igeriuttakkanik minnerpaamik 30-nik Israelimut ullup ingerlanerani igeriussipput.
Allattoq Mads Lynge
januaarip 09-at 2009 17:26
Gazami inunnik ikiuiniarneq ingerlanneqarsinnaajunnaarmat inuit atugarliornerujussuat nunanit allanit isumakulunnartoqartinneqarpoq. Sulili sakkuaakkunnaarnissamut annikikkaluamik neriunnartoqarpoq.
Tassami Franskit Igitsinimiullu sakkuaakkunnaarnissamut pilersaarusiaat suli isumaqatigiinniutigineqarmat neriuuteqartoqalaaraluarpoq. Israelimiulli suli peqqarniisaarnerulernissaminnut eqqanaarsarpasittut, Danmarkip Radioaniit ilanngutassiortoq, Steen Nørskov nalunaarpoq.
Naalagaaffiit Peqatigiit ikiuiniartitaat Israelimiunit ippassaq eqqaanneqaramik suliatik unitsikkaluarpaat, Gazamili Naalagaaffiit ikiuniartitaat Israelimiunit eqqaanneqannginnissaminnik unnuleraa neriorsorneqaramik suliaminnik aallartitseqqissinnaanerat neriunarsivoq.
