Israelimiut Gazami tupeqarfimmut saassussineranni palæstinamiut 24-t toqutaasut

Palæstinamiut ikinnerpaamik 24-t israelimiut Gazap kujasissortaani Khan Younisimi ilaqutariinnut qimaatinneqarsimasunut tupeqarfinnut silaannakkut saassussineranni toqutaapput. 

Nutaarsiassaqartitsiviup Reutersip allaaserisaa naapertorlugu peqqinnissamut oqartussaasut sapaammi taama nalunaaruteqarput.

Israelip nunaqqatigiinnut ungusimasaminut sakkutooqarnikkut saassussinini annertunerulersillugu saassussinerit amerlivai.

Saassussinermi kingullermi arnat meeqqallu aamma toqutaasimasut, sakkutuut nakorsartaasa atilerlugit taaneqanngitsut oqaatigaat. 20-nit amerlanerusut ikilerneqarsimapput toqqillu arlallit ikuallatsinneqarlutik.

Israelimiut ulluni kingullerni saassussineri palæstinamiunik hunnorulikkaanik toqutsiffiusut, Gazami peqqinnissamut ministereqarfiup nalunaarutigaa.

Sumiiffimmi peqqarniisaarniartut taaneqartunit, Hamasimit aqunneqartumi oqartussat naatsorsuinerit uku inuinnaat sakkutuullu annaaneqartut immikkoortinngilaat.

Naalagaaffiit Peqatigiit: Inuannik nungusaanermut assinguvoq

Sakkutuutut suliniuteqartup Hamasip saassussinerit "peqqarniitsumik pinerluuteqarnertut nutaatut", arfininngornermi unnukkut nalunaarummi oqaatigai. Hamasip USA-p aqutsinera sakkortunerulertoqarneranut pisuutippaa.

Israelip Gazamut ikiugasuarnerit marsip aappaanili mattuppai.

Naalagaaffiit Peqatigiit inuit pisinnaatitaaffii pillugit højkommissæriata, Volker Türkip Israelip Gazamut saassussinermini sakkortusiartornera assuaraa.

Innuttaasunik nuuitsitsiniarneq "inuiannik nungusaanermut" assingusoq, taassuma tallimanngornermi oqaaseqaammi oqaatigaa.

Israelip Hamasillu akornanni aaqqiagiinnginneq Hamasip Israelimut 2023-mi oktobarip arfineq-aappaani saassussinerani sakkortunerpaalerpoq. Tassani inuit 1200-t toqutaapput, israelimiullu kisitsisaataat naapertorlugit inuit 250-it tiguagaapput.

/ritzau/