Israelimiut eqqartuussivilersuunniarneqarlerput
Tuluit aviisiata tutsuiginartup ”The Guardian”-ip Israelip Gazami peqqarniisaarnera pillugu ullumi allaaserisaa naapertorlugu, Naalagaafiit Peqatigiiffianni nunat sinniisuutitaat sisamanngorpat ataatsimiilerunik nunat tamat akornanni pinerlussimasunut eqqartuussivimmut Israeli eqqartuussassanngortinneqassasoq piumasaqaatigilersaarpaat.
Naalagaafiit Peqatigiit Palæstinamiut akornannut aallartitaat, Richard Fork oqarpoq, Israelip Gazamut saassusseqattaarnera Naalagaafiit Peqatigiit iluanni inuit pisinnaatitaaffii pillugit isumaqatigiissusiap imaanik sakkortuumik unioqqutitsinerusut. Taassumalu saniatigut nunat tamat akornanni inatsisaasut, Inuillu illersorneqarnissaat pillugit Genevemi isumaqatigiissutit Israelip unioqqutikkai.
Richard Fork, Naalagafiit Peqatigiiffiannit aallartitaajutigaluni aamma USA-mi Princetonip Universitetiani nunat tamat akornanni inatsisit pillugit professoriusoq oqarpoq, sorsunnerit nalaanni sakkutuujunngitsut illersorneqarnissaat pillugit Genevemi isumaqatigiissutaasut Israelip unioqqutikkai, immikkut ilisimasasallit isumaqatigiissutigigaat. Isumaqatigiissutini taakkunani ilaatigut allassimasut naapertorlugit, Gazami inuit sakkutuujunngitsut illersorneqarnissaat, nerisassaqartinnissaat nakorsaatissaqartinnissaallu Israelip qulakkeertaiaqaraluarai.
Tuluit nunanut allanut naalakkersuisoqarfiannit tusatsiakkat naapertorlugit Israelip nunat tamat akornanni pinerlussimasunut eqqartuussivimmut Israelip tunniunneqarnissaa, Tuluit naalakkersuisuisa tapersersorniarlugu eqqarsatigigaat.
Danmarkimi ministeriunerup, Anders Fogh Rasmussenip oqaasii illuatungilerlugit nunanut allanut ministerip, Per Stig Møllerip oqaatigaa Gazami sakkutuujunngitsunik Israelip eqquinera peqqarniippallaartoq.
- Hamasimeersut Israelimut qaartartunik igeriussisarnerannut Israelip illersorniarnissaa assortorneqarsinnaanngikkaluartoq, Israeli ingasaassilluni peqqarniisaarniartussaatitaanngilaq, Folketingimi Nunanut allanut ataatsimititaliamut akissuteqarnermini nunanut allanut ministeri ilaatigut oqarpoq. Israelip peqqarniisaarnera pillugu isornartorsiuinerit illuatungaanarsiuinerunerarlugit, Anders Fogh Rasmussen ippassaq oqarpoq.
