Israelimiut anguniagartik angulivippaat
Israelimi naalakkersuisut siulittaasuat ullumi Israelimi aviisinut nalunaarpoq israelimiut Libanonimi anguniagartik angulivikkaat.
- Hizbollah-kkut uatsinnik saassutinnatik eqqarsaqqaartariaqarput, Ehud Olmert oqarpoq.
Taamatut oqarneq assortigineqarpoq. Libanonimi akersuunnerit Israelimiut amerliartuinnartut isornartorsiortalerpaat.
Israelimiut sapaatip-akunnerini pingasuni hizbollah-kkunnik Libanonimi saassussisaqattaarneri malunnaatilimmik kinguneqanngimmata sakkutuut, inatsisartuni ilaasortat tusagassiortullu kinaassutsiminnik isertuussillutik isornartorsiuisalerput, DR-ip Kangiani Qiterlermi tusagassiortua Steffen Kretz taama oqarpoq.
Taanna aperineqarpoq Libanonip Israelillu killeqarfiisa eqqaanikkavit ippassaq akersuunnerit qanoq oqaluttuarisinnaanerai, ima oqaluttuarpoq:
- Sapaatip akunneri pingasut matuma siorna hizbollah-kkut Israelip tungaanut qaartartumeerisarneri unitsinniarlugit israelimiut tamatuminnga unititsiniarlutik akersuutilerput. Hizbollah-kkut ippassaq 230-eriarlutik Israelip tungaanut qaartitsipput. Taamaattumik israelimiut angorusutartik angoqqajarsimanngikkaat oqarsinnaavunga, Steffen Kretz oqarpoq nangillunilu.
- Israelimiut Libanonip kujasinnerusortaani nunaminertaq 30 kilometerisut isorartutigisoq isumannaallisaaffiginiarlugu pilersaaruteqarput, tamannali ajornakusuussagunaqaaq. Tamannali anguneqarsinnaavoq israelimiut sakkutuui 50.000-t missaanni amerlatigisut nunakkoorlutik Libanonimut isaatinneqarpata, Steffen Kretz naggasiivoq.
