Israelimi naalakkersuisut ajornartorsiortinneqalerput

januaarip 17-at 2007 10:48

Israelimi naalakkersuisut ajornartorsiortinneqalerput. Illersornissamut pisortaq Dan Halütz tunuarpoq, Libanonimi Hizbollah-mut iluatsinngitsumik aasaq sorsunneq patsisaatinneqarluni – kisianni isornartorsiuisut tamanna naammaginngilaat. Taakkua piumasaraat naalakkersuisut siulittaasuat, Ehud Olmert, aamma illersornissamut ministeri akisussaatinneqassasut:

Naalakkersuisut siulittaasuata Ehud Olmertip illersornissamut ministerini tunuaqqulersaanngilaa, tassami Libanonimi sorsunneq pillugu nalunaarusiarsuup tunuartinneqarnissaa toqqaannartumik piumasarinngilaa. Maannali naalakkersuisut sorsunnermi qanoq inissisimanerat pillugu nalunaarusiaq saqqummingajalerpoq. Illersornissamullu pisortap Halützip akisussaanini nassuerutigalu maanna tunuarpoq.

Olmertip illersornissamut ministerimi tunuarnissaa kissaatiginngilaa, tassami illersornissamut pisortap tunuarneratigut, nammineq isornartorsiorneqalersussaagami.

Israeli sorsunnermi ajorsakkajuttuunngikkaluarpoq, kisianni Libanonimi Hizbollahmut sorsunnermi kukkusoqarpoq. Israelimiut sakkutuutik marluk Hizbollah-mit tigusaasut aniguisinniaraluarpaat peqatigitillugulu Hizbollahp sakkuaattartui Libanonimi toqqorsimaffimminnit saassusseqattaartuartut suujunnaarseriaraluarlugit. Kisianni sakkutuut taakkua marluk suli aniguisinneqanngillat, Hizbollah-kullu aatsaat taama nukittutigilerput. Hizbollahp pisortaata aasaq sorsunnermi ajugaasimallutik nalunaarutigaa. Maanna Israelimi partit naalakkersuisunit talerperliunerusut saammerliunerusullu naalakkersuisut tunuarnissaat piumasarilerpaat.

- Maanna naalakkersuisut siulittaasuat aamma illersornissamut ministeri tunuartariaqalerput, partimit Likud-imit taama oqartoqarpoq. Tassami naalakkersuinikkut saliisoqartariaqarmat.

Israelimi naalakkersuisut siulittaasuannut Ehud Olmertimut ippassaq ulloq ajorluinnarpoq. Sakkutooqarnikkut ajornartorsiuleruttortoq inatsisinut atortitsinermut ministereqarfik aalajangerpoq, Israelimi aningaaseriviit annersaata tulliata 2005-imi namminersortunngorsarneqarneranut atatillugu Olmertip inissisimanera politiinit misissuiffigineqassasoq.