Israelimi naalakkersuisunngortitsisoqarpoq
Israelimi partiit marluk, Kadihma-p Sulisartullu Partiiata, naalakkersuisooqatigiilernissaat ilimanarsivoq.
Israelimi talerperliit, Likudikkut, ukiorpassuarni naalakkersuisuusarsimapput. Massakkullu qiterliit, Kadihmakkut, saamerliillu, Sulisartut Partiiata, naalakkersuisooqatigiinnissaat ilimanarsivoq.
Kadihmap siulittaasua, Ehud Olmert, naalakkersuisunngortitsiniarnermi isumaqatiginninniartussatut Israelimi præsidentimit ullumi toqqarneqarpoq, Israelimilu naalakkersuisooqatigiilersussani siuttuunissaa ilimagineqalereerpoq.
Israelimi naalakkersuisooqatigiit assigiinngitsut ukiuni qulini kingullerni isasooqattaarnerisa kingunerisaanik qinersisoqakulaartorujussuummat DR-imi tusagassiortoq aperaarput qanoq sivisutigisumik Ehud Olmertip siuttuunissaa ilimagineraa, ima akivoq:
- Olmertip ulluni tulliuttuni isumaqatigiisitsiniarnissaa qanoq sivisutigisumik atanissaanut apeqqutaalluinnarpoq. Kadihmakkut Sulisartullu Partiiat naalakkersuisunngortitsissanisaminnut amigartooqqapput. Inatsisartuni inissat 61-t amerlanerussutaasinnaapput, namminnerlu qinersinermi katillugit inissat 48-t pissarsiarinikuuvaat. Taamaattorli Sulisartut Partiiat qinersinermi allamik siuttoqalerpoq, taassuma pingaartippaa innuttaasut atugarissaarnerulernissaannut suliniutit aallartinneqarnissaat. Tamannalu Kadihmakkunnit qanillineqarsinnaalluartutut isikkoqarpoq. Taamaattorli naalakkersuisooqatigiilissagaluarunik assigiinngitsunik aporfissaqarput, soorlu Hamasikkunnut qanoq pissuseqarnissaq nalunarluinnarpoq.
