Israelimi inatsisartunut qinersineq aallartippoq
Qinersisartut isumasiorneqarnerat kingulleq malillugu, Israelimi partiit anginerit marluk naligiittorujussuupput.
Israelimi nunanut allanut ministeriusup Tzipi Livnip partiia Kadima illuatungilliuttullu siuttuata Benjamin Netanyahup partiia Likud qinersinermi naligiittorujussuunissaat eqqoriarneqarpoq.
Qinersisartut qanoq amerlatigisut qinersiartornissaat apeqqutaatinneqarpoq.
Israelimi sumiiffinni arlalinni siallerpoq. Qinersisartut ikittuinnaat qinersiartornissaanut ilimasunneq ilaatigut pissuteqarpoq, Israelimi inatsisartunut qinersinissamut aallussinerup annikinnera kiisalu Gazamut sorsunneq qineqqusaarneq peqqutaatinneqarlutik.
Qinersisartut isumasiorneqarnerat kingulleq sapaatip akunnerata naanerani suliarineqartoq malillugu qinersisartut 20 procentiisa aalajanginngilaat kina qinissanerlugu. Amerlasuullu qinersiartorniaratik nalunaarsimapput.
