Israeli naalakkersuisortaalerpoq
apriilip 30-at 2006 16:48
Israeli naalakkersuisortaarnissaa qanillivoq.
Sulisartut partiiat upperisarsioqatigiillu Shas-partii ullumi Kadima naalakkersuisunngoqatigissallugu akuersipput.
Taamaalilluni Kadima-p siulittaasua Ehud Olmert Israelimi naalakkersuisut siulittaasussanngorpoq.
Taassuma suliassaq annertooq tigusussanngorpaa, tassa sanilimik palæstinamiut eqqisseqatiginissaat. Olmerti qineqqusaarami Palæstinap naalakkersuisuinik Hamasikkunnik isumaqatiginninniarnissaq naaggaarluinnarlugu qineqqusaarpoq.
Israelip kitaani tiguarneqarsimasumi juutinik qimagutsitsinissaq maanna pilersaarutigineqalerpoq. Juutit qimagutereerpata Israelip Palæstinallu killeqarfissaat aatsaat aalajangiunneqassaaq. Tassa isumaqatiginninniutigineqaqqaassanngilaq.
