Israeli Emiratillu eqqisseqatigiinnissamut isumaqatigiissuteqartut
Israelimiut Palæstiinamiut nunaataannik tiguaasarnerat isumaqatigiissutitigut unitsinneqarpoq. De Forenede Arabiske Emiraterini kunngissaq taama oqarpoq. Nutaarsiassaqartitsivik Reuters taama allaaserisaqarpoq.
- Israelimiut Palæstiinamiut nunaataannik tiguaasarnerata unitsinneqarnissaa, præsident Trumpip, Israelillu ministeriunerata Netanyahup oqarasuaatitigut oqaloqatigineqarnerisigut unitsinneqarpoq, Sheikh Mohammed Bin Zayed oqarpoq.
- De Forenede Arabiske Emiratit Israeilillu nunat marluk akornanni atassuteqalersitsinissamut suleqatigiinnissamullu aamma isumaqatigiissuteqarput, taanna oqarpoq.
Emiratit Israelillu, USA peqatigalugu ataatsimut oqaaseqaataanni ilaatigut oqaatigineqarpoq Vestbreddenimut oqaaseqartussaanissamut sukataarutiginninneq unitsinneqartoq.
Israelilli ministeriunerata Benjamin Netanyahup kingorna oqaatigaa Palæstiinamiut nunaataannik tiguaasarneq unitsinneqavinnani unitsikkallarneqaannartoq.
AAMMA ATUARUK Trump eqqisseqatigiinnissamut pilersaarut pillugu: Palæstinamut aamma iluaqutaassaaq
Israelip De Forenede Arabiske Emiraterillu eqqisseqatigiinnissamut isumaqatigiissusiornerat pingaarutilerujussuusoq, Israelip Washingtonimi aallartitaata oqaatigaa.
Isumaqatigiissut Abrahamimik taaguuserneqarsimasoq USA-p præsidentianit Donald Trumpimit aamma nersualaarneqarpoq:
- Pingaarutilimmik ullumi pisoqarpoq. Ikinngutitta Israelip De Forenede Arabiske Emiraterillu akornanni eqqisseqatigiinnissamik isumaqatigiissusiortoqarpoq, Trump Twitterikkut taama ilaatigut allaaserisaqarpoq.
Trump isumaqatigiissusiortoqarnissaanut ikiuussimasoq nalunaarutigineqarpoq.
Sulilu pisoqarumaartoq, taassuma tusagassiortunut oqaatigaa:
- Tamanut suli saqqummiussinnaanngisannik pisoqarpoq, Trump oqarpoq. Nutaarsiassaqartitsivik AFP taama allaaserisaqarpoq.
Palæstiinamiulli isornartorsiuipput. Palæstiinamiut suliniaqatigiiffiata PLO-p oqaaseqaritaata Hana Ashravip Israelip De Forenede Arabiske Emiraterillu isumaqatigiissusiornerat apeqquserpaa.
Nunat arabiamioqarfiusut akornanni marluk allat, Igitsini Jordanilu, Israelimik atorfilittatigut attaveqartutuaapput.
/ritzau/Reuters
