Israel suli saassussiniarpoq
Israelip Libanonimik saassussinini sapaatip-akunnerata tulliup naanerata tungaanut ingerlanniarlugu nalunaarutigereeraalu, hisbollah-p rakettit 190-it Israelip avannarpasinnerusortaanut igeriuppai, nutaarsiassaqartitsivik AFP taama allappoq.
Ataaseq toqutaasimaneragaavoq, 19-illu ikilerneqarsimaneragaallutik. Ikinnerpaamik rakettit 36-t inuit najugaqarfiinut tussimasut oqaatigineqarpoq.
Ullormiit ullormut toqutaasut amerliartorput. Sapaatit akunnerini kingullerni pingasuni Israelip Libanonillu akornanni akersuunnerit Libanonimiut 634-t inuunerinik naleqarsimapput, Israelimiullu 55-it inuunerinik naleqarsimallutik.
Akersuunnerit kingunerisaannik ikinnerpaamik inuit 750.000-it, imaluunniit Libanonip innuttaasa sisamaraterutaat, najugarisaminnit qimaasimapput.
