Israel qaartartumeeriuarsinnarpoq
Qana 310706 unnukkut RB
Naak Israelimiut nalunaaqquttap akunnerini 48-ni qaartartumeeriunnaarallarniarlutik nalunaaruteqarnikuugaluartut, Libanonip kujasinnerusortaani illoqarfiit Israelimiut timmisartuutaannit malersuutinit ullumi qaartartumeeqqinneqarput.
USA-p nunanut allanut ministeriata Condoleezza Rice-p Kangiani Qiterlermiinnerata nalaani qaartartumeeriunnaarallarnissaq isumaqatigiissutigineqarsimagaluarpoq.
Akunnerni 48-ni qaartartumeeriunnaarallarneq naappat Israelip Libanonimut akiuukkunnaarallarnissamik isumaqatigiissusiornissaannik nunat tamalaat piumasaqaataat Israelimiunit itigartinneqarpoq.
- Akiuukkunnaarallarnissamik isumaqatigiissusioraluarutta Hisbollah ajugaasutut imminut isigissaaq, Israelip illersornissamut ministeria Amir Peretz oqarpoq.
Illoqarfiit ilaat Qana ippassaq qaartartumeermassuk meeqqat 36-t toqutaanerat nunarsuarmioqatigiinnit aalassassutigineqarpoq.
- Israelimiut nalunaaquttap akunnerini 48-ni qaartartumeeriunnaarallarnerat eqqisseqatigiinnissap suliniutigineqarnerani alloriarneq siulliusoq Frankrigimi ministeriuneq, Dominique de Villepin oqarpoq.
Ruslandimi nunanut allanut ministereqarfimmit nalunaarutigineqarpoq, Qana-mi qaartartumeerineq nunat tamat malittarisassaannik unioqqutitsinerusoq.
Libanonimi sakkuaattoqarnissaa nunallu tamat tamaani sakkutuuliinissaat EU-mit suli piumasarineqarpoq.